Сүүлийн хэдэн өдөр оросын мэдээллийн зарим сайтуудад Монгол оронд тарваган тахал гарлаа, Монголоос тахлын аюул нүүрлэж байна, монголд 17 настай залуу 39 настай эрэгтэй тарваган тахлаар өвдөж хорио цээр тогтоожээ гэсэн мэдээллүүд гарч байгаатай холбогдуулан ОБЕГ няцаалт ирүүлжээ.

Австралиас бусад бүх тив тарваган тахлын байгалийн голомттой, Төв Азийн тарваган тахлын байгалийн голомтын зонхилох хэсэг нь  Монгол оронд байдаг бөгөөд нийт нутаг дэвсгэрийн 30 орчим хувь 18 аймгийн 130 гаруй сум тарваган тахлын байгалийн голомттой.

Сүүлийн 5 жилд Завхан, Говь-Алтай, Баян-Өлгий, Говьсүмбэр, Хөвсгөл аймагт тарваган тахал өвчний 6 тохиолдол гарч, 7 хүн өвчилж 2 хүн нас барж Улсын онцгой комиссоос 116,6 сая төгрөгийн зардал гарган аюулгүй болгож байсан болно.

Тарваган тахлын хүний өвчлөлийн сэжиг илрэх, батлагдах тохиолдол бүрийг Дэлхийн эрүүл мэндийн байгууллагад албан ёсоор мэдээлэх үүргийг улс орон бүр хүлээдэг. 

Монгол Улсад үүссэн нийгмийн эрүүл мэндийн ноцтой байдлыг Дэлхийн эрүүл мэндийн байгууллагад албан ёсоор мэдээлэх эрх, үүрэг бүхий байгууллага нь Халдварт өвчин судлалын үндэсний төв бөгөөд 2011, 2012 онд Монгол Улсад тарваган тахлын хүний өвчлөлийн тохиолдол, дэгдэлт гарсан тухай тус байгууллагын мэдээ гараагүй.

Иймд оросын мэдээллийн зарим сайтуудад  гарсан дээрх мэдээлэл нь үндэслэлгүй болно. ОБЕГ-ын гамшигтай тэмцэх газар гэжээ.