Шүүхийн Ерөнхий зөвлөлийн ээлжит хуралдаан өнөөдөр болж  17 асуудал хэлэлцлээ. Хуралдаанаар Х.Батсүрэн, Х.Сонинбаяр нарыг Улсын Дээд шүүхийн   шүүгчийн, Ж.Оюунтунгалаг, Ч.Хосбаяр нарыг Нийслэлийн шүүхийн шүүгчийн, В.Цэцэнбилэгийг Архангай аймаг дахь сум дундын шүүхийн шүүгч, Ерөнхий шүүгчийн, М.Ризаг Баян-Өлгий аймгийн захиргааны хэргийн шүүхийн шүүгчийн, А.Сарантуяаг Нийслэлийн Сонгинохайрхан дүүргийн шүүхийн шүүгчийн, Б.Халиуныг Нийслэлийн Чингэлтэй дүүргийн шүүхийн шүүгчийн албан тушаалд томилуулахаар болжээ. Тэтгэвэр тогтоолгох насанд хүрсэн тул Ц.Тогоохүүг Нийслэлийн  шүүхийн шүүгчийн, Л.Банзрагчийг Дундговь аймаг дахь сум дундын шүүхийн шүүгчийн, Л.Борыг Баянхонгор аймаг дахь сум дундын шүүхийн шүүгч, Ерөнхий шүүгчийн албан тушаалаас чөлөөлүүлэх тогтоол гаргасан байна. Мөн гэмт хэрэг үйлдсэн нь нотлогдсон тул Д.Оюунжаргалыг Төв аймаг дахь сум дундын хоёрдугаар шүүхийн шүүгчийн албан тушаалаас огцруулах тухай саналыг Монгол Улсын Ерөнхийлөгчид өргөн мэдүүлэхээр тогтоол гаргажээ.
Түүнчлэн Өмнөговь аймаг дахь сум дундын хоёрдугаар шүүхийн тамгын албаны орон тоо, албан тушаалтнуудын ангилал, зэрэглэлийг батлах, зарим аймгийн шүүхийн тамгын хэлтэс, албаны үйл ажиллагааг шалган тусалсан дүн, анхан шатны шүүхийн “Иргэн-1” програм хангамжийг хүлээн авч нэвтрүүлэх, зарим шүүгчид зэрэг дэвийг нэмэгдүүлэн олгох тухай асуудлыг шийдвэрлэв.