ЦЕГ-ын дарга Б.Билэгтийн тушаалаар хөрөнгө, орлогоо нуусан зарим хурандааг ажлаас нь халжээ. Тэрээр Авлигын эсрэг хуулийн 13 дугаар зүйлийн 13.8.4-т заасан “нэг  жилийн цалинтай тэнцэх буюу түүнээс их хэмжээний хөрөнгө, орлогыг мэдүүлээгүй, худал мэдүүлсэн, эсвэл хөрөнгө, орлогын мэдүүлгээ гаргаж өгөөгүй, татгалзсан бол албан тушаалаас нь огцруулах буюу ажлаас хална” гэснийг баримталж, Мэдээлэл шуурхай удирдлагын төвийн Захиргааны хэлтсийн дарга, цагдаагийн хурандаа А.Эрдэнэбаяр, ЗЦГ-ын Эрүүгийн хэрэг бүртгэх, мөрдөн байцаах хэлтсийн дарга, цагдаагийн дэд хурандаа С.Мөнхтамга, Баянгол дүүргийн Цагдаагийн хэлтсийн дарга, цагдаагийн хурандаа Н.Амарзаяа нарыг цагдаагийн байгууллагын ажлаас нь халжээ. Түүнчлэн  Дархан-Уул аймгийн цагдаагийн газрын Замын цагдаагийн тасгийн дарга, цагдаагийн дэд хурандаа Б.Баттулгад Авлигын эсрэг хуулийн 13 дугаар зүйлийн 13.8.2-т заасны дагуу сахилгын шийтгэл ногдуулж хариуцлага тооцсон бол Чингэлтэй дүүргийн Цагдаагийн хэлтсийн дарга, цагдаагийн хурандаа Б.Амгаланбаатарыг ажлаас нь чөлөөлсөн байна.