Хүний хөгжлийн мөнгөө авч чадаагүй хүн олон бий. Тэд энэ мөнгөө авч чадах болов уу гэсэн хүлээлт тээсээр олон сар болж байна. Энэ мөнгийг ямар нэгэн байдлаар өгүүлнэ гэж УИХ-ын гишүүн С.Ганбаатар, Ц.Даваасүрэн тэргүүтэй гишүүд хэлсэн удаатай. Тэгвэл эл мөнгийг иргэдэд өгөх боломж байгаа эсэхийг УИХ-ын гишүүн, Хүн амын хөгжил, ниймгийн хамгааллын сайд С.Эрдэнээс тодрууллаа.

-Хүний хөгжлийн мөнгөө авч чадаагүй иргэд олон байна. Энэ мөнгийг өгөх боломж бий юу. Уг нь, энэ мөнгө бол хуульчлагдсан төсөвт мөнгө нь суусан байх ёстой биз?
-Яах аргагүй хуульчлагдсан мөнгө. Гэвч санхүүжилт нь дуусч, мөнгө нь дутсан. Хүний хөгжлийн сангийн данс улайсан, мөнгө байхгүй. Гэхдээ энэ мөнгийг өгнө. Яагаад гэхээр яалт ч үгүй хуульчлагдсан болохоор өгч таарна. Гэхдээ хэзэ гэдгийг тодорхой хэлэхэд хэцүү. Санхүүжилтийг нь 2013 оны төсөвт суулгахаар ажиллаж байна. Ер нь, энэ мөнгийг авч чадаагүй иргэдийн хувьд өөрсдөөс нь шалтгаалсан. Бичиг баримтын зөрчлөөс болоод мөнгө авч чадаагүй. Тэгвэл бичиг баримтаа бүрдүүлбэл мөнгөө авах боломжтой.
-Өндөр настан болон хөгжлийн бэрхшээлтэй иргэд 660 мянган төгрөг авах ёстой. Үүнийгээ хүлээсээр л байна?
-Энэ мөнгийг гурван аймгаас бусдад нь өгөөгүй байгаа. Энэ мөнгөний эх үүсвэр бүрдвэл олгоно. Ямартай энэ ондоо багтааж олгож дуусгана.  
-Тэтгэврийн зөрүүг арилгах хууль батлагдсан. Хэзээнээс хэрэгжүүлэх вэ?
-Энэ хууль 900 гаруй мянган иргэнд үйлчлэх юм. Хууль үйлчлэх журмыг арваннэгдүгээр сард багтааж гаргана. Иргэн өргөдөл гаргаснаар энэ хуульд хамрагдах эрх үүснэ. Хууль үйлчилснээр тухайн хүний ажилласан хугацаа таваас арван жилээр нэмэгдэнэ. Жил нь нэмэгдээд ирэхээр халамжийн тэтгэвэртэй хүмүүс хувь тэнцүүлсэн, хувь тэнцүүлсэн тэтгэвэртэй нь бүрэн тэтгэвэртэй болж, бүрэн тэтгэвэртэй хүмүүсийн авдаг мөнгө нэмэгдэх боломжтой.