Арлын Япон Улсад ажлын айлчлал хийхээр зорьсон Гадаад харилцааны сайд Л.Болд тус улсын Гадаад хэргийн сайд К.Гэмбатай хэлэлцээ хийсэн байна. Шинэчлэлийн Засгийн газрын гадаад бодлогын зорилтуудыг Л.Болд сайд Японы талд танилцуулж, “гуравдагч хөрш” болох Япон Улстай Стратегийн түншлэлийн зарчмаар харилцаа, хамтын ажиллагаагаа хөгжүүлэх нь манай гадаад бодлогын тэргүүлэх чиглэлийн нэг гэдгийг онцолжээ. Иймд дээрх бодлогын хүрээнд харилцааныхаа эрх зүйн үндсийг боловсронгуй болгох, харилцан ашигтай эдийн засгийн хамтын ажиллагааг өргөжүүлэн хөгжүүлэх зорилт тавин ажиллаж байгааг дуулгасан байна. Хоёр улсын гадаад хэргийн сайд нар Эдийн засгийн түншлэлийн хэлэлцээрийн ач холбогдлыг үнэлж, хүүхэд залуучуудын солилцоог өргөжүүлэх, НҮБ зэрэг олон улс, бүс нутгийн төвшний хамтын ажиллагааг бэхжүүлэхээр санал нэгджээ. Энэхүү яриа хэлэлцээний үеэр Монгол, Японы Стратегийн түншлэлийг хөгжүүлэх дунд хугацааны хөтөлбөр байгуулан ажиллахаар тохирсон аж.

Үүнээс гадна Япон Улсын Эдийн засаг, худалдаа, үйлдвэрийн сайд Ю.Эдано, Батлан хамгаалахын сайд С.Моримото, Либерал Ардчилсан намын дарга Ш.Абэ, Олон улсын хамтын ажиллагааны банк (JBIC)-ны Гүйцэтгэх захирал Х.Ватанабэ нартай уулзаж, Монгол, Японы Стратегийн түншлэлийг улс төр, батлан хамгаалах, эдийн засаг, бизнесийн хамтын ажиллагааны салбарт өргөжүүлэн хөгжүүлэх агуулгын талаар ярилцсан байна.