Байгаль орчин, ногоон хөгжлийн яамны шинээр томилогдсон Төрийн нарийн бичгийн дарга Ж.Батболдын санаачилгаар удирдах ажилтны шуурхай хурлаа ажлын бус цагаар хийж байхаар тогтжээ. Өнгөрсөн хугацаанд салбарын шуурхай хурал даваа гараг бүрийн 09:30 цагт эхэлж, хоёр цаг орчим хуралддаг байсан бол энэ сарын 1-нээс эхэлж, даваа гараг бүрийн 17:00 цагаас хуралдаж байхаар болсон байна. Ингэснээр ажлын цагаа удирдах ажилтнууд бүрэн ашиглаж, төрийн албан хаагчид ажлын өндөр ачааллын өдөр иргэдэд бүтэн цагаар үйлчлэх боломж бүрдэж байгаа гэнэ.
Яамны удирдах ажилтны шуурхай хурлаар газар, хэлтэс, харьяа нэгжүүд өнгөрсөн долоо хоногийн ажлаа тайлагнаж, ирэх долоо хоногт хийх ажлаа төлөвлөж хэлэлцдэг аж. Мөн салбарын хэмжээнд тулгамдаж буй онцгойлон анхаарал хандуулах цаг үеийн шинжтэй асуудлуудыг шуурхай хэлэлцэн шийдвэрлэх үүрэгтэй.
Шуурхай хуралд яамны газар, хэлтэс, албад, үндэсний хороод, харьяа байгууллагын бүх удирдах албан тушаалтан биечлэн оролцож, сайд, дэд сайд, төрийн нарийн бичгийн даргаас үүрэг чиглэл авч ажилладаг юм байна.