УИХ-ын гишүүн Ц.Оюун­гэрэл, Л.Эрдэнэчимэг, Г.Уянга, Р.Бумаа нар Аймаг, сум, дүүргийн иргэдийн төлөөлөгчдийн хурлын сонгуулийн тухай хуульд нэмэлт өөрчлөлт, оруулах тухай хуулийн төслийг өчигдөр УИХ-ын дарга З.Энхболдод өргөн барилаа. Тэдний санаачилсан хуулийн төсөл нэг л заалттай. Тодруулбал, орон нутгийн сонгуульд “нам, эвслээс нэр дэвшигчдийн жагсаалтад аль нэг хүйсийн төлөөлөл 30 хувиас доошгүй байна” гэсэн заалтыг дээрх хуульд нэмж өгөхийг хүсч байгаа юм. Орон нутгийн сонгуульд нэр дэвшигчдийг бүртгэх ажил энэ сарын 9-нд дуусна. Үүнээс өмнө буюу энэ сарын 5-наас хуулийн дээрх заалтыг хэрэгжүүлж эхлэхийн тулд УИХ-ын эмэгтэй гишүүдийн бүлгээс УИХ-ын дарга З.Энхболдод хүсэлт тавьсан байна.
Учир нь, Аймаг, сум, дүүргийн иргэдийн тө­лөө­лөгчдийн хурлын сон­гуулийн тухай хуулийг бат­лагдсаны дараа энэ хуульд эмэгтэйчүүдийн квотын асуу­дал тусгагдсангүй гэж УИХ дахь эмэгтэй гишүүдийн бүлэгт олон санал, гомдол, шүүмжлэл ирсэн гэнэ.

Аймаг, сум, дүүргийн иргэдийн төлөөлөгчдийн хур­лын сонгуулийн тухай хуулийг УИХ-аар хэлэлцэх үед улс төр дэх хүйсийн тэгш байдлыг 2008 оныхоор баримжаалжээ. Тухайн үеийн дүнгээс үзэхэд, аймаг, сум, дүүргийн хэмжээнд нам, эвслээс нэр дэвшигч эмэгтэйчүүдийн хувь хуульд тусгайлан заасан квотгүйгээр дунджаар 40, суудал авсан эмэгтэйчүүдийн хувь нь дунджаар 30 байж. Үүнийг орон нутагт жендэрийн тэгш байдал УИХ-ын оролцоогүйгээр үндсэндээ хангагдсан, Монгол Улс НҮБ-ын Мянганы хөгжлийн зорилтын нэг жендэрийн тэгш байдлыг хангах үүргээ орон нутгийн төвшинд хангалттай биелүүлсэн үзүүлэлт гэж үзээд Аймаг, сум, дүүргийн иргэдийн төлөөлөгчдийн хур­лын сонгуулийн тухай хуульд квотын асуудлыг тусгаагүй гэнэ. Гэвч өнөөдөр улс төрд эмэгтэйчүүдийн оролцоо нэмэгдсэн, өрсөлдөөн ширүүс­сэн учир 2008 оны үзүүлэлтийг харгалзаж хуульд квотын тухай оруулаагүй нь буруу гэж олон хүн шүүмжилсэн учир УИХ дахь эмэгтэй гишүүдийн бүлэг дээрх хуулийн төслийг санаачилж өргөн барьснаа өчигдөр сэтгүүлчдэд дуулгалаа.

УИХ-ын гишүүн Ц.Оюун­гэрэл “УИХ-ын сонгуульд эмэг­тэйчүүдийн гаргасан амжил­тыг бататгах заалтыг  Аймаг, сум, дүүргийн иргэдийн тө­­лөөлөгчдийн хурлын сон­гуу­лийн тухай хуульд оруулж байгаа юм. Энэ талаар Зас­гийн газраас санал авсан. Бидэнд дэмжлэг үзүүл­сэн. Орон нутгийн сонгуульд нэр дэвшигчдийг бүртгэх ажил дуу­сахаас өмнө яаравчлан хуулиа батлуулах хэрэгтэй байна. Хугацаа маш бага үлд­лээ. Тиймээс энэ хуульд оруулах өөрчлөлтийг бодолцож нэр дэвшигчдээ бүртгээрэй. УИХ-ын бусад гишүүн хуулийг дэмжиж өгөөрэй гэж уриалмаар байна” гэв.