УИХ-ын гишүүн Д.Батцогтоос Орон нутгийн сонгуулийн талаар цөөн асуултад хариу авлаа.

-Танай намын хувьд орон нутгийн сонгуульд хэрхэн оролцох гэж байна вэ. АН-тай хамтрана гэсэн мэдээлэл бий?
-Орон нутгийн сонгуульд АН-тай хамтран оролцох тухай ярьж байна. Гэхдээ ямар байдлаар хамтрахаа одоогоор тогтоогүй байна.
-Засаг байгуулсан шигээ явах уу. Аль эсвэл үр дүнгээрээ хамтрах уу. АН-ынхны хувьд үр дүнгээрээ хамтарна гэж ярьж байсан?
-Яг ямар байдлаар хамтрахаа эцэслэж тогтоогүй байгаа. Учир нь, АН-ын орон нутаг дахь гишүүд бас дангаараа орох гээд байгаа бололтой. Аль болох дангаараа эрх барих сонирхол байгаа байлгүй. Тийм болохоор яг эцэслэж тогтож чадаагүй л байна.
-Танай нам дангаараа орон нутгийн сонгуульд оролцох боломжгүй юу?
-Дангаараа орно гэдэг хүндрэлтэй. Гишүүнчлэлийн хувьд ч гэсэн янз бүр байдаг болохоор хэцүү. Тэгээд ч зардал мөнгө их гарна шүү дээ. Жижиг намуудын хувьд зардал мөнгө гэдэг хүндрэлтэй асуудал. Орон нутагт байгаа гишүүн болгон л өрсөлдөхийг бодож байгаа. Бидний зүгээс тэднээс хэн нь сонгогдох магадлал өндөр байна вэ гэдгийг харна.
-УИХ-ын гишүүн Г.Уянгын хувьд АН-аас гадна хэд хэдэн намтай хамтрах тухай ярьсан байсан?
-Ер нь, энэ асуудлыг намын түвшинд ярьж л байна. Эцсийн шийдвэр гараагүй байна. Гэхдээ ямар ч байсан МАН-тай хамтрахгүй гэдгээ мэдэгдсэн.