УИХ дахь бүлэг бүлэг буюу МАН-ын гишүүд цаг үеийн асуудлаар хуралджээ. Тэд хурлаараа МАН-ын бүлгийг албажуулах, бүлгийн завсарлага авахтай холбоотой асуудал, УИХ-ын даргыг томилох, чуулганы ирц бүрдэхтэй холбоотой олон асуудлыг цогцоор нь шийдэх зэрэг асуудлыг хэлэлцэн санал дүгнэлтээ гаргасан байна. Энэ талаар УИХ-ын гишүүн Н.Энхболд “УИХ-ын Дэгийн тухай хуулийн дагуу бүлгийн завсарлага хугацаатай байх талаар гишүүд санал солилцсон. Хугацаатай байх нь нэг талаасаа давуу, нөгөө талаасаа сул талтай байдаг. Тиймээс Ардын намаас хугацаатай байх нь зөв. Гэхдээ яг хэдэн хоногийн завсарлагатай байх талаар дахин хэлэлцэж байж шийднэ. Эхний ээлжинд тав хоног дараагийнх нь гурав хоног байхаар хэлэлцэж байгаа” гэсэн юм.
УИХ-ын Дэгийн тухай хуульд УИХ-ын чуулганы анхны хуралдааныг насаар хамгийн ахмад гишүүн даргалдаг. Гэвч үүнийг зөрчиж хууль бусаар хуралдсан АН болон эвслийн гишүүдэд гомдож яваа МАН гишүүд Дэгийн тухай хуульд энэ асуудлыг “УИХ дахь олонх болсон намын насаар хамгийн ахмад гишүүн даргална” гэж өөрчлөх санал гарчээ. Харин ямар нэгэн нам олонх болоогүй тохиолдолд хуулиар зохицуулахаар зааж өгчээ.
Мөн байнгын хороодод гишүүд хэрхэн, ямар байдлаар хамрагдах эсэхийг ч тэд ярилцсан байна. Байнгын хорооны хувьд 21 гишүүнтэй байх нь зүйтэй гэж үзжээ. Харин нэг гишүүн гурван байнгын хороонд байх нь үр ашиггүй. Тиймээс нэг гишүүн хоёр байнгын хороонд байх, сайдаар ажиллаж байгаа бол нэг байнгын хороонд хамаарагдах нь зүйтэй. Ингэснээр нэг гишүүн нэг байнгын хороонд байж мэргэжлийн түвшинд ажиллах чиг хандлагыг хэрэгжүүлэх хэрэгтэй гэсэн саналыг МАН дэвшүүлж байгаа аж.