“Тавантолгой төмөр зам” ХХК-ийн хэрэгжүүлж буй төслүүдийн нэг болох Тавантолгойн ордоос нүүрсийг вагонд ачиж тээвэрлэх логистикийн төвийн бүтээн байгуулалтын ажил дуусаж, улсын комиссын дүгнэлтээр байнгын ажиллагаанд оруулахад бэлэн боллоо.Монгол Улсын Засгийн газрын 2021 оны 89 дүгээр тогтоолын хэрэгжилтийн хүрээнд “Тавантолгой төмөр зам” ХХК нь ТНАЛТ төслийн багц 1-4 -д Захиалагчийн хяналтыг амжилттай хэрэгжүүлэн ажилласан юм.Тавантолгойн нүүрс ачих логистикийн төв (ТНАЛТ)-ийг байгуулснаар жилдээ 20 сая тонн, цагт 3500 тонн түүхий нүүрсийг дэлхийн жишигт нийцсэн технологийн дагуу бутлах, ангилах, холих, дамжуулан ачих хүчин чадалтайгаар хоёр улсын хил хооронд зөөж тээвэрлэх юм. Ингэснээр нүүрс тээврийн зардлыг бууруулах, байгаль орчинд ээлтэйгээр олборлолтын хүчин чадлыг эрс нэмэгдүүлэх зэрэг чухал ач холбогдолтой болох юм.Тавантолгойн нүүрс ачих логистикийн төвийг ашиглалтад оруулах талаар Монгол Улсын аж үйлдвэр, Эрдэс баялгийн яамны Улсын комиссын актыг 2024 оны аравдугаар сарын 01-ний өдөр гаргасан байна. Тус актад “Эрдэнэс Тавантолгой” ХХК-ийн “Тавантолгойн нүүрс ачих логистикийн төв” нь Ашигт малтмалын тухай хуулийн 35 дугаар зүйлийн 35.4 дэх хэсэг, Уул уурхай хүнд үйлдвэрийн сайдын 2022 оны А/303 дугаар тушаалд заасны дагуу “Уурхай, уулын болон баяжуулах үйлдвэрийг ашиглалтад хүлээлгэн өгөх бэлтгэл ажил“-ыг хангасан гэж үзсэн талаар дурджээ.Тавантолгойн нүүрс ачих логистикийн төв нь нэгдсэн удирдлагын байр, засварын төв агуулах, уурын зуух зэрэг үндсэн барилгаас гадна бутлуур, туузан дамжуурга, овоологч тэжээгч, вагон тэжээгч тоног төхөөрөмж бүхий дагалдах байгууламжаас бүрдэнэ.Засгийн газрын ойрын хугацаанд хэрэгжүүлэх 14 мега төслийн нэг болох Монгол Улс, БНХАУ-ын хооронд Гашуунсухайт-Ганцмодны боомтын төмөр замыг холбосноор экспортын ачаа тээврийн эргэлтийг илүү сайжруулж, эдийн засгийн үр өгөөжийг нэмэгдүүлэх бүрэн боломжтой боллоо гэж “Тавантолгой төмөр зам” ХХК-иас мэдээллээ.