Монгол Улсын Ерөнхийлөгчийн Тамгын газрын дарга П.Цагаан, Олон улсын ардчилал, сонгуулийн туслалцааны хүрээлэнгийн Ази, Номхон далайн бүсийн захирал Эндрю Эллис нар Монголын ардчилалд үнэлгээ хийх асуудлаар хамтран ажиллах Санамж бичигт гарын үсэг зурлаа. Уг баримт бичигт гарын үсэг зурсныхаа дараа ноён Эндрю Эллис “Монголчууд урьд нь ардчилалдаа гурван удаа үнэлгээ хийлгэсэн. Монголын ардчилал хэр зөв замаар явж байна, цаашид хэрхэн бэхжүүлэх вэ гэдгийг тодруулах зорилгоор үнэлгээ аудит хийсэн юм. Одоо дөрөв дэх удаагаа үнэлүүлэх гэж байна. Ардчиллыг бэхжүүлэхтэй холбоотой энэ удаагийн үнэлгээнд монголчууд өөрсдөө оролцон хамтран ажиллах болно. Бид олон оронд төсөл хэрэгжүүлдэг. Ази, Номхон далайн бүсэд гэхэд Тайланд, Филиппин, Индонези, Непалд ардчиллыг бэхжүүлэх, сонгуулийн тогтолцоог боловсронгуй болгох, иргэн бүрийг сонгуульд идэвхтэй оролцдог байлгах талаар төсөл хэрэгжүүлсэн. Одоо Монгол Улстай хамтран ажиллах гэж байна” гэж хэлжээ. Өнгөрсөн 22 жилийн ардчиллын үйл явцад бодит үнэлгээ өгөхийн сацуу аудит хийлгэж, цаашид яаж боловсронгуй болгох вэ гэдгийг тодорхойлох үүднээс ийнхүү хамтран ажиллах гэж байна. Ардчилал гэдгийн цаана хүний эрх, хэвлэлийн эрх чөлөө, иргэдийн оролцооноос эхлээд их олон зүйл багтаж байгаа хэмээн Ерөнхийлөгчийн Тамгын газрын дарга П.Цагаан хэлсэн байна. Монгол Улс ардчиллыг бэхжүүлэх, сонгуулийн тогтолцоог боловсронгуй болгох зорилгоор Стокгольм хотод төвтэй Ардчилал, сонгуулийн туслалцааны олон улсын энэ байгууллагад 2010 онд гишүүнээр элсчээ.