-Цахим үнэмлэхний хэвлэлтийн явц хэр байна вэ?
-Аравдугаар сарын 1-ний байдлаар 18-аас  дээш насны иргэдийн  96.4 хувь буюу  1.7 сая гаруй хүний цахим үнэмлэхийг хэвлэж орон нутгуудад хүргэсэн. Тараалт 80 гаруй хувьтай байна. 1.3 сая гаруй иргэн цахим үнэмлэхээ авсан.
-Орон нутгийн сонгууль болохоос урьтаж  цахим үнэмлэхийг хэвлэн  тарааж дуусах уу?
-Сонгуулийн насны иргэдийн дөрөв гаруй хувийнх нь цахим үнэмлэх   хэвлэгдээгүй. Эдгээр иргэн  шилжих хөдөлгөөнд орсон, хаяг болон ургийн овгийн мэдээлэл зөрүүтэй байгаа. Тиймээс тэдний  мэдээллийг 21 аймаг, 9 дүүрэгт өгч баталгаажуулж, энэ сарын 15 гэхэд хэвлэж дуусаад орон нутагт хүргэнэ. Өөрөөр хэлбэл, ирэх сарын 1 гэхэд 1.8 сая иргэний үнэмлэхийг тарааж дуусахаар ажиллаж байна.
-Цахим үнэмлэхээ авчихаад алдсан, хаяж  үрэгдүүлсэн иргэд  хаана хандаж, хэдэн төгрөгөөр дахин хэвлүүлж авах вэ?
-Үнэмлэхээ алдсан, хаясан гэх тохиолдол  байна. Иргэний цахим үнэмлэхний үнийн асуудлыг  Засгийн газрын хуралдаанаар батална. Дахин хэвлэх үнэ тодорхой болсны дараа иргэний цахим үнэмлэхээ алдсан, хаясан хүмүүсийн үнэмлэхийг хэвлэж эхэлнэ.  Харин цахим үнэмлэх нь хэвлэгдсэн иргэдийн хувьд нийслэлийн иргэн бол хорооны ажилтнаас,  орон нутгийн иргэд аймаг, сумын бүртгэлийн ажилтнаас  авах ёстой. Нэг хороо, суманд 3000 гаруй иргэн байдаг. Харин нэг л бүртгэлийн ажилтан ажиллаж байгаа. Тиймээс цахим үнэмлэхээ аваагүй иргэд хороо, сумын ажилтанд хандах хэрэгтэй.
-Тэгвэл үнэ тодорхой болтол цахим үнэмлэхээ гээсэн хүмүүс яах вэ?
-Оршин суугаа хороо, сумын ажилтанд хандаж үнэмлэхээ алдсан, гээсэн гэдгээ бүртгүүлэх хэрэгтэй.