УМБГ-ын Эдийн засгийн гэмт хэрэгтэй тэмцэх хэлтсийнхэн ХХААХҮЯ-ны Төрийн нарийн бичгийн дарга асан Т.Гантулга, тус яамны Хөнгөн үйлдвэрийн бодлогын хэрэгжилтийг зохицуулах газрын дарга асан М.Баярмагнай нарыг шалгаж эхэлжээ.  Тэдэнд Эрүүгийн хуулийн бусдын эд хөрөнгийг завшиж, үрэгдүүлсэн гэсэн зүйл ангиар эрүүгийн хэрэг үүсгэсэн байна.  
Тус яамнаас Жижиг, дунд үйлдвэрлэлийг дэмжих сангийн хүрээнд 2012 онд төсөвт тусгасан 500 сая төгрөгийг зориулалтынх нь дагуу ашиглаагүй аж. Тодруулбал, Завхан аймагт 2012 оны тавдугаар сард жижиг дунд үйлдвэрийг дэмжих нэрээр ямар ч төсөл сонгон шалгаруулахгүйгээр 500 сая төгрөгийг долоо хоногийн дотор төсвөөс гаргаж, нэр бүхий 108 иргэн, аж ахуйн нэгжийн данс руу шилжүүлжээ. Нэг үгээр хэлбэл, энэ 500 сая төгрөг иргэдийн амьжиргааг дээшлүүлэх жижиг, дунд үйлдвэрлэлийг нь дэмжихэд зарцуулагдах ёстой байв. Гэтэл энэ хэмжээний мөнгийг  ямар замаар 108 иргэн, аж ахуйн нэгжийн хувийн данс руу шилжүүлсэн нь, яагаад төсөл сонгон шалгаруулалт явуулаагүй нь, мөнгө авсан иргэд ямар үйлдвэрлэл, үйлчилгээ эрхэлсэн нь тодорхойгүй байгаа гэнэ. Иймээс цагдаагийнхан 500 сая төгрөгийг хэн нэгэн завшсан байж магадгүй хэмээн сэжүүр гарган шалгаж эхэлжээ.
Мөрдөн байцаалтын явцад цуглуулсан баримтаас харахад, 108 иргэн, аж ахуйн нэгжийн удирдлага дунд УИХ-ын ээлжит сонгуульд нэр дэвшсэн хүн ч байсан аж. Тиймээс дээрх мөнгийг сонгуулийн сурталчилгаанд зориулсан байх магадлалтай гэдгийг ч хууль хяналтынхан хэлж байв.
Энэ хэрэгт ХХААХҮ-ийн сайд асан Т.Бадамжунай тэргүүтэй тус яаманд газар, хэлтсийн даргаар ажиллаж байсан хүмүүсийг ч мөрдөн байцаалтын явцад шалгах шаардлагатай гэнэ. Жижиг, дунд үйлдвэрлэлийг хөгжүүлэхийн тулд төрөөс санхүүгийн дэмжлэг үзүүлэх бодлого баримталж буй. Гэтэл энэхүү бодлого нь зарим орон нутагт гажуудаж, гаргаж өгсөн хөрөнгийг нь зүй бусаар зарцуулах явдал дээрх мэтээр гарч байгааг олон хүн шүүмжилж байна. Юутай ч, хууль хяналтынхан дээрх хэргийн үнэн мөнийг олж тогтооно биз ээ.