УИХ-ын 26 гишүүн түр хороо байгуулахаар УИХ-ын даргад хандав. Уул уурхайгаас шууд хамааралтай болсон өнөө үед энэ салбар хэдийгээр хөгжиж байгаа ч түүхийгээр нь хил давуулж, манай улсад хөрөнгө оруулалт болж чадахгүй байгаа. Түүхий эдээ боловсруулах үйлдвэр барих ажил ч удааширч байна гэж дээрх гишүүд үзэж буй. Иймээс уул уурхайн хөгжлийн бодлого тодорхойлох, нэгдсэн төлөвлөлт боловсруулах талаар УИХ-аас баталсан хууль, тогтоомжийн хэрэгжилтийг судалж, дүгнэлт гаргаж УИХ-ын 2012 оны намрын ээлжит чуулганд танилцуулах үүрэг бүхий “Уул уурхайн хөгжил” түр хороог байгуулахаар тогтоолын төсөл санаачилсан байна. Энэ тогтоолын төслөө УИХ-ын даргад өнгөрсөн баасан гарагт УИХ-ын гишүүн Б.Бат-Эрдэнэ, Д.Батцогт, Г.Уянга, С.Ганбаатар нар өргөн барилаа.
Уул, уурхайн үйлдвэрлэл эрхлэгчид өөрсдийн дураар зам гаргаж, хүнд даацын авто машинаас уул уурхайн бүтээгдэхүүнийг хямд үнээр хил давуулж байгаа, байгаль орчин сүйтгэж, нөхөн сэргээхдээ шаардлага хангахгүй байна гэж дээрх гишүүн ярьж байгаа юм. Иргэд, малчид болон уул уурхайн үйлдвэрлэл эрхлэгчид, ТББ, төрийн байгууллагуудын хооронд уялдаа, харилцан ойлголцлол, зөвшилцөл үүсгэхийг “түр хороо”-ны гишүүд үзэж байгаа аж.
Түр хороонд Б.Бат-Эрдэнэ, О.Баасанхүү, Д.Бат-Эрдэнэ, Ж.Батзандан, Ж.Батсуурь, Д.Батцогт, Н.Батцэрэг, З.Баянсэлэнгэ, Г.Баярсайхан, Б.Болор, Х.Болорчулуун, С.Бямбацогт, С.Ганбаатар, Ц.Даваасүрэн, Ц.Дашдорж, Б.Наранхүү, С.Одонтуяа, Д.Оюунхорол, М.Сономпил, А.Тлейхан, Д.Тэрбишдагва, Ч.Улаан, Г.Уянга, Л.Цог, Ц.Цолмон, Р.Бурмаа нар багтжээ.