УИХ-ын Хууль зүйн байнгын хорооны хуралдаанаар өнгөрсөн долоо хоногийн пүрэв, баасан гаригт Төрийн ордны орох хаалгуудыг жагсагчид хааж ордонд нэвтрэх хөдөлгөөнийг түгжсэн, УИХ дахь МАН-ын гишүүд чуулганы танхимын хаалгыг буйдангаар таглаж УИХ-ын үйл ажиллагааг тасалдуулсан зэрэг асуудлыг хэлэлцлээ. Энэ бүхэн нь Монгол Улсын Төрийн ордны тухай хуулийг зөрчсөн үйлдэл болж байхад Төрийн ордны хамгаалалтын алба, Төрийн тусгай хамгаалалтын ажилтнууд зохицуулах арга хэмжээ аваагүй талаар хөндөж ярилаа.  Хуралдаанд оролцсон УИХ-ын дарга З.Энхболд хууль зөрчсөн, МАН-ын харьяалалтай УИХ-ын гишүүдийг  торгох,  Төрийн ордны хамгаалалтын албаны дарга хурандаа н.Лхагвасүрэн, Төрийн тусгай хамгаалалтын газрын хуулийн зөвлөх хошууч н.Тогтохням нарт албан үүрэгтээ хариуцлагагүй хандсан гэж арга хэмжээ авах хэрэгтэй гэлээ.