УИХ-ын Хууль зүйн байнгын хорооны өнөөдрийн хуралдаанаар УИХ-ын тогтоолын төслийг хэлэлцсэн юм. Худалдааны тухай хуулийн төсөл, Эрүүгийн хуулийн төсөл, Нэмэгдсэн өртөгийн албан татварын тухай хуулийн төслийг эргүүлэн татахыг Байнгын хорооны гишүүд дэмжиж хассан юм. Худалдааны тухай хуулийн хувьд өмнө нь Гадаад харилцааны сайдын эрхлэх асуудлын хүрээнд байсан аж. Харин Эдийн засгийн хөгжлийн яам байгуулагдсанаар энэ хуулийг Н.Батбаяр сайдын харьяанд очиж байгаа болохоор дахин боловсруулахаар болж байгаа юм байна. Мөн Эрүүгийн хуулийг Хууль зүйн яамнаас дахин боловсруулах юм байна.
Мөн энэ Байнгын хорооны хуралдаанаар УИХ-ын гишүүний халдашгүй байдалд халдсан тохиолдолд халдашгүй байдлыг хэн хамгаалах, яаж тогтоох вэ гэдгийг хэлэлцсэн юм.

УИХ-ын гишүүн Р.Бурмаа: Намайг ажилдаа ирэхэд жагсагчид цохисон. Тэгэхэд хамгаалалтын гурван хүн байсан. Намайг хамгаалсангүй. Төрийн ордон гэдэг байшинг хамгаалдаг юм уу, эд юмыг нь хамгаалдаг юм уу. Гишүүнд гар хүрч байхыг хамгаалалтынхан хараад л зогсоод байсан. Тэгэхээр зогсож байгаа харуулууд юу хамгаалдаг юм бэ?

УИХ-ын гишүүн З.Баянсэлэнгэ: Би төрийн тусгай хамгаалалтын ажилчид гишүүдээ таньдаггүй юм болов уу. Ордны үүдээр ороод ирэхээр үнэмлэх асуугаад зогсоогоод байдаг. Ажилдаа үнэхээр сайн хийдэг юм болов уу гэхээр сая болж өнгөрсөн жагсаалын үед биднийг хамгаалсангүй байна. Тайван замаар жагсаал цуглаан хийх эрх иргэдэд байгаа. Жагсаал ямар зорилготой юм, ямар хор хохиролтой юм гэдгийг тогтоох ёстой байсан юм болов уу. Өнгөрсөн аравдугаар сард би гарын үсэг цуглуулсныхаа төлөө Урьдчилан саатуулах 111 төвд 14 хоног хорьсон. Тэгэхээр хууль хэнд үйлчлээд байгаа юм бэ. Надад сонирхолтой байна. Прокурорт гар хүрсэн гээд найман сар дарамталсан. Хэний захиалгаар ингэж явсан юм. Тэгэхээр шүүхийн өмнө эрх тэгш байх зарчмыг хэрэгжүүлье. Шинэчлэлийн Засгийн газар үүнийг анхаарах хэрэгтэй.

Төрийн хамгаалалтын албаны дарга,хурандаа Г.Лхагвасүрэн: УИХ-ын гишүүн Төрийн ордны хашаа руу орж ирсэн тохиолдолд бид аюулгүй байдлыг хамгаална. Хашааны цаана байгаа тохиолдолд цагдаагийн байгууллага хариуцах ёстой.

УИХ-ын гишүүн Р.Бурмаа: Намайг хамгаалалтынхны нүдэн дээр зодоод байхад хамаагүй юу?

Хурандаа Г.Лхагвасүрэн: Төрийн тусгай албаны тухай хуулийн 6 зүйлд хамгаалалтад байх субьектийг хамгаална гэж заасан. Үүнд УИХ-ын дарга, Ерөнхий сайд, Ерөнхийлөгч гэх мэтийг хамгаална гээд тодорхой заасан байгаа. Түүнээс УИХ-ын гишүүнийг биечлэн хамгаална гэсэн заалт байхгүй.
Төрийн тусгай албаны хамгаалагчийн эрх тодорхой хэмжээгээр хязгаарлагддаг. Төрийн ордны нутаг дэвсгэр хашаагаар хамгаалагддаг. Тухайн өдөр ЦЕГ, НЦГ-т дэмжлэг үзүүлээч гэж хүссэн. Түүнээс хашаанаас цаана байгаа зүйлд хүч хэрэглэх нь хуулиар хориотой болдог юм.

УИХ-ын дарга З.Энхболд: Энэ ажиллагаа хангалттай байсан гэж үзэх үү. Төрийн ордны хаалгыг таглаж суусан. Үүнийг тэгвэл юу гэж ойлгох вэ. Та нар үүнд ямар арга хэмжээ авах ёстой юм.

Төрийн тусгай хамгаалалтын хуулийн зөвлөх, хошууч Тогтохням: Төрийн ордны тухай хуулийн дагуу торгуулийн арга хэмжээ авах ёстой. Гэтэл УИХ-ын тухай хуульд УИХ-ын гишүүдэд торгуулийн арга хэмжээ авах боломжгүй байсан. Тухайлбал, УИХ-ын тухай хуулийн 6.1-ээр хязгаарлачихаад байгаа юм.

УИХ-ын дарга З.Энхболд: Та нар ажлаа хийж чадахгүй бол ажлаа өг.

УИХ-ын гишүүн Батцогт: Бид өмнө олон жагссан. Тугнаас урд л жагсдаг байсан шүү дээ. Гэтэл МАН-ын намыхан жагсахаараа төрийн орды хашааны хаалга хааж, чуулганы үүдийг таглаж болдог юм уу.
Төрийн тусгай хамгаалалтын хуулий зөвлөх, хошууч Тогтохням:Төрийн ордон руу орох хаалгыг хаасан нь хууль зөрчсөн. Бид хууль зөрчсөн үйлдлийг баримтжуулсан байгаа. Торгуулийн арга хэмжээ авахаар ажиллаж байна.

УИХ-ын гишүүн Д.Ганбат: Хүрэлсүх Баярсайханыг зодсон. Ингэж зодолдож байхад та нар юу хийв. Ингэж зодолдож байгаад нэгнийгээ алчихвал яах вэ. Хууль сахиулсан уу. Энхбаярыг баригдаж байхад тухайн үед гурван гишүүнийг диван доор хийгээд орхисон. Тэр үед УИХ-ын гишүүний халдашгүй дархан байдал байхгүй юм байна гэж ойлгосон. Тэгэхээр та нар энд ажилладаг хүмүүсийн хувьд зодолдсон хүмүүст торгуулийн арга хэмжээ авах ёстой юм биш үү?

Төрийн тусгай хамгаалалтын хуулий зөвлөх, хошууч Тогтохням: Энэ асуудлыг судлаад дүгнэлт гаргахаар явж байна. Төрийн тусгай хамгаалалтын тухай хууль 1995 онд батлагдсан.

УИХ-ын дарга З.Энхболд: Төрийн ордны тухай хуульд маш тодорхой заасан. Эрүүгийн хариуцлага, захиргааны хариуцлага хоёрыг ялгадаггүй ийм хүмүүсээс болж хууль хэрэгжихгүй байна. Бурмаа гишүүний хэлдэг зөв шүү дээ. Ийм тохиолдолд энэ хүмүүс ажлаа хийх ёстой. Гэтэл энэ хүмүүс ажлаа хийхгүй байна. Хууль дутсандаа бус энэ хүмүүс ажлаа хийхийг хүсэхгүй байна.

УИХ-ын гишүүн С.Бямбацогт: Би дэмжихгүй байна. Бурмаа гишүүний ярьж байгаа зүйл буруу. АН гишүүдэд халдашгүй байдал үйлчилдэг, МАН-ын гишүүд хууль зөрчсөн хариуцлага тооцно гэдэг буруу юм. Би үүнд хамарсч байна.

УИХын гишүүн Ш.Түвдэндорж: УИХ, Ерөнхий сайдын өрөө рүү дайрч орсон. Хоорондоо зодолдсон зүйл гарлаа. Тэгэхээр ажлаа хий. Төрийн ордны хамгаалалтын албаны хүмүүст үүрэг болгоход хууль зөрчсөн ийм хүмүүст торгуулийн арга хэмжээ авч түүнийгээ танилцуулахыг үүрэг болгоё гэв.