МАХН-МҮАН-ын “Шударга ёс” эвслийн 11 дэх суудлын эзэн Ц.Оюунбаатар УИХ-ын гишүүний тангаргаа өргөөгүй яваа. Өнгөрсөн долоо хоногт түүнийг Өвөрхангай аймгийн иргэдийн төлөөлөл болсон гэж үзсэн Г.Батхүү, Д.Зоригт нартай хамт УИХ-ын гишүүний тангаргаа өргөж магадгүй гэсэн мэдээлэл түгсэн.
Гэвч МАН-ынхан Өвөрхангайн Сум дундын шүүхийн болон СЕХ-ны шийдвэр хууль бус учир АН-аас нэр дэвшсэн Г.Батхүү, Д.Зоригт нараар УИХ-ын гишүүний тангараг өргүүлэхгүй гэж жагсаал, суулт хийж эсэргүүцлээ илэрхийлсэн. Ингэж тэмцлийн хэлбэрт шилжсэний эцэст тэд УИХ-ын гишүүний тангараг өргүүлэх асуудлыг чуулганы хуралдаанаар хэлэлцэхийг хойшлуулж чадсан билээ. Тиймээс Ц.Оюунбаатар УИХ-ын гишүүний тангаргаа өргөж чадаагүй гэхэд болно. Гэхдээ тэрээр ирэх долоо хоногийн УИХ-ын чуулганы нэгдсэн хуралдаанд тангаргаа өргөхөөр болоод буй гэнэ.