Нэгэн цагт хууль зүйн салбарыг толгойлж явсан УИХ-ын гишүүн Ц.Нямдорж сөрөг хүчний байр сууриа илэрхийлж, эрх баригч АН-ыг шүүмжиллээ. Учир нь, чуулганы нэгдсэн хуралдаанд оролцож буй олонхийн бүлгийн түшээдийн тоо цөөн, ирц хангалтгүй байгаад дургүйцлээ илэрхийлж “Эрх баригчид  ирцээ бүрдүүл. Хэн хаана, ямар ажилтай байна гэдгийг хуралдааны эхэнд танилцуулаач” хэмээсэн юм.  Түүнийг ийнхүү хэлэхэд С.Бямбацогт гишүүн ч өлгөн авч “Хуралдаа ирээгүй гишүүдийн картыг шургуулж ирц бүрдүүлэх нь хууль бус шүү. Энэ ажлыг хуралдаан зохион байгуулагчид хийж байна. Ийм асуудал гаргуулахгүйн тулд холбогдох хүмүүстэй  хариуцлага тооцох ёстой” гэж хэллээ.
Харин УИХ-ын дарга З.Энхболд “Хэлэлцэх асуудалтай холбоотойгоор үг хэлэх ёстой. Энэ асуудлыг зохицуулах талаар ажиллаж байгаа. Хурууны хээгээр ирц бүрдүүлдэг асуудлыг удахгүй шийднэ. Одоогоор төсөвт мөнгө байхгүй учир энэ асуудлыг БНСУ-ын  Олон улсын хамтын ажиллагааны Койка байгууллагатай хамтран тус улсын Засгийн газрын 3,5 сая ам.долларын буцалтгүй тусламжаар хийх болно” хэмээн тайлбарлалаа.