Сүүлийн үед Ерөнхийлөгч Ц.Элбэгдорж албан тушаалаа урвуулан ашиглаж, бусдын өмч хөрөнгийг завшсан хэргээр ял сонсоод буй МАХН-ын дарга, Ерөнхийлөгч асан Н.Энхбаярт уучлал үзүүлэх нь гэсэн яриа түгэх болов. Үүнийг Ерөнхийлөгчийн сонгуультай холбож тайлбарлах нь ч бий. Хэдийгээр хууль зөрчиж, гэмт хэрэг үйлдсэн ч нэгэн цагт төрийн гурван өндөрлөгийн албыг хашсан түүний Монгол Улсын төлөө хийсэн, бүтээснийг нь үнэлээд уучлал үзүүлэхэд болохгүй гэх газаргүй. Гэхдээ Н.Энхбаяр Ерөнхийлөгч Ц.Элбэгдоржид хандаж,  уучлал үзүүлэхийг хүссэн тохиолдолд энэ асуудал шийдэгдэх учиртай. Тэгээд ч экс Ерөнхийлөгчийн хэргийг бүх шатны шүүх хэлэлцэж дуусаагүй байгаа. Түүнд холбогдох хавтаст хэргийг гурав хоногийн өмнө Улсын Дээд шүүхэд хүргүүлсэн. Учир нь, давж заалдах шатны шүүхийн магадлалыг Н.Энхбаяр болон түүний өмгөөлөгч нар хүлээн зөвшөөрөхгүй хяналтын шатны шүүхэд гомдол гаргасан билээ. Тус өмнөх хоёр шатны шүүхийн шийдвэрийг хэвээр үлдээсэн тохиолдолд тэд Улсын Дээд шүүхийн Ерөнхий шүүгчид хандаж, зохиомол гээд байгаа хэргээ нийт шүүгчдийн хуралдаанаар хэлэлцүүлэх тухай гомдол гаргаж болно. Өөрөөр хэлбэл, нийт шүүгчид өмнөх гурван шатны шүүхийн шийдвэрийг хэвээр үлдээсэн тохиолдолд тухайн ялтан Ерөнхийлөгчөөс уучлал гуйж болохыг холбогдох хуульд тусгасан байгаа юм.
Дээрх яриатай холбоотой хоёр “Э” хэн нь хэнийгээ уучлах ёстой вэ гэсэн маргаан иргэдийн дунд өрнөж байна. МАХН-ын зарим гишүүн гэхэд л “Яасан гэж Ерөнхийлөгч Ц.Элбэгдорж Н.Энхбаяр даргыг уучлах ёстой юм бэ. Түүнд хилс, зохиомол хэргээр ял оноосон. Тийм учраас харин ч Н.Энхбаяр дарга Ерөнхийлөгч Ц.Элбэгдоржийг уучлах ёстой” гэж ярьж байна.