АТГ-аас хөрөнгө орлого болон хувийн ашиг сонирхлын мэдүүлгээ өгөөгүй 96, хугацаа хожимдуулж өгсөн долоон албан тушаалтанд хариуцлага тооцуулахаар 27 байгууллагын удирдах ажилтанд албан бичиг илгээсэн. Энэ талаар тус газрын Хяналт шалгалт, дүн шинжилгээний хэлтсийн ахлах ажилтан, ахлах комиссар Б.Энхтуяагаас зарим зүйлийг тодрууллаа.
-Одоогоор хөрөнгө орлого, хувийн ашиг сонирхлоо мэдүүлээгүй хэчнээн албан тушаалтанд хариуцлага тооцсон байгаа бол?
-Улсын хэмжээнд 46 мянган албан тушаалтан хөрөнгө орлого болон хувийн ашиг сонирхлын мэдүүлгээ өгөх учиртай. Тэднээс 103 нь мэдүүлгээ гаргаж өгөөгүй, хугацаа хожимдуулсан байгаа. Тиймээс манай газраас  тухайн албан тушаалтныг томилсон, ажилд авсан эрх бүхий удирдах ажилтнуудад нь холбогдох хуулийн дагуу хариуцлага тооцох тухай албан бичиг илгээсэн. Энэ дагуу өнөөдрийн байдлаар 38 албан тушаалтанд хариуцлага тооцсон байна.
-Тэдэнд ямар хариуцлага тооцсон бэ?
-Тэдний хоёр нь ажлаас халагдсан, нэгийнх нь хоёр сарын цалинг 30 хувиар бууруулсан, 12-т сануулга, 18-д нь анхааруулга өгчээ. Харин тавыг нь эрүүгийн гэмт хэрэгт шалгагдаж байгаа болон бусад шалтгаанаар ажлаас нь чөлөөлсөн байна.