Ерөнхий сайд Н.Алтанхуяг энэ сарын 5-7-нд зүүн гурван аймагт ажиллахаар төлөвлөжээ. Орон нутагт ажиллахаас өмнө Хэнтий, Дорнод, Сүхбаатар аймгийн удирдлагуудтай видео уулзалт хийв.  
Эдгээр аймагт шийдэгдэх асуудлууд олон байгаа, зайлшгүй оролцоотой аль яам, агентлагийн төлөөллийг газар дээр нь ажиллуулах шаардлагатайг Засаг дарга нараас асуужээ.

Дорнод аймагт орон нутгийн төсвийн орлого энэ оны сүүлийн хоёр сард тасрахаар байгаа болон төсвийн хөрөнгөөр баригдах гурван барилгын ажил зогсонги байдалтайг танилцуулав. Сүхбаатар аймгийн хувьд Өндөрхаанаас Баруун-Урт хүртэлх замын болон хоёр сургуулийн байрны барилгын ажил хүндрэлтэй байгаа аж. Харин Хэнтий аймагт орон сууцны хөнгөлөлттэй зээлд төрийн албан хаагчид хамрагдах нөхцөл олгогдохгүй, зээлийн эх үүсвэр тодорхойгүй байгааг дуулгасан юм.
Засгийн газрын тэргүүн дээрх асуудлуудаар холбогдох албаныхантай Засаг дарга нарыг видео уулзалт хийлгэж, асуудлыг илүү нарийвчилж тодруулах үүргийг ЗГХЭГ-ын дэд даргад даалгалаа. Асуудлыг илүү тодорхой болсны дараа орон нутагт ажиллах үеэрээ зохих шийдвэр гаргах юм байна. Ерөнхий сайд Сүхбаатар аймагт ажиллах үеэрээ “Шинэчилж шийдье-222” уулзалт хэлэлцүүлгээ “Аймгийн төв бүрийг хот болгоё” сэдвийн дор зохион байгуулахаар болжээ.