Энэ онд эдийн засгийн хямралын улмаас нефтийн хэрэглээ өсөөгүй байна. Иймд олон улс оронд шатахууны жижиглэнгийн үнэ буурсан аж. Судлаачид ирэх онд шатахууны хэрэглээ 1.3 хувиар өсөх таамаг дэвшүүлээд буй юм. Учир нь, Япон улсын шатахууны хэрэглээ нэмэгдсэнтэй холбон тайлбарлаж байгаа. Тус улс цөмийн эрчим хүчний хэрэглээгээ шатахуунаар орлуулах бодлого баримталж буй. Шинжээчид энэ онд түүхий нефтийн нийлүүлэлт 3.5 хувиар өсч  эрэлтээ давна хэмээжээ.  Дэлхийн зах зээлд өчигдөр нэг баррель нефть 108 ам.доллар байв. Энэ уг ашигт малтмалын үнэ буурч байгааг илтгэж буй билээ. Өнгөрсөн сарын эхээр баррель нь 116 ам.доллар байсан юм. Дэлхийн улс төрийн тогтворгүй байдал нефтийн үнийг хөдөлгөдөг. Тухайлбал, АНУ, Европын холбоо Ираны цөмийн хөтөлбөрт  хориг тавьсан нь улс төрийн эрсдэлийг нэмэгдүүлж  өнгөрсөн хавар баррель газрын тосны үнэ өсч 105 ам.доллар болж өссөн. Тэгээд дэлхийн эдийн засгийн хямралын нөлөөгөөр өнгөрсөн наймдугаар сард 85 ам.доллар болж буурсан билээ. Гэвч Сири улсын дотоодын мөргөлдөөний улмаас дахин өсч 96 ам.долларт хүрсэн байна. Энэ оны сүүлчээр нэг баррель газрын тос 94 ам.доллар байх төсөөлөл гарав. Ирэх онд зуу орчим ам.доллар байх  таамаглал судлаачид хийжээ. Харин ирэх хоёр, гурван жилд нефтийн эрэлт сэргэж, жилийн хоёр хувийн өсөлттэй байх төлөв бий гэнэ.