Хэсэг хугацаанд нам гүмхэн нуугдмал байдалд байсан УИХ-ын  гишүүн У.Хүрэлсүх өчигдөр парламентын спикертэй уулзах хүсэлт тавьсан ч чуулганы нэгдсэн хуралдаантай байснаас УИХ-ын даргын завдал болоогүй гэнэ. Харин эрхэм гишүүн өнөөдөр УИХ-ын даргатай З.Энхболдтой уулзаж УИХ-ын гишүүнээсээ татгалзах хүсэлтээ өгөх гэж байгаа хэмээн Төрийн ордон дахь баталгаатай эх сурвалж мэдээллээ.
“Нэрээ сольсноос болоод  УИХ-ын сонгуульд манай нам ялагдвал  хариуцлагыг нь би хар толгойгоороо хүлээнэ” гээд байсан нь ч яахав намын нь дотоод асуудал юм гэхэд эрхэм түшээ,  УИХ-ын гишүүн Г.Баярсайханыг Төрийн ордонд барьж зодсон нь нэр хүндэд нь ихээхэн сэв суулгаад байгаа. Үүний дараахан намын анхан шатны байгууллагуудаас ихээхэн шүүмжлэл ирүүлж, намын удирдлагууд нь ч зэмлэл хүртээсэн. Үүнээсээ хойш У.Хүрэлсүх гишүүн ёстой ор сураггүй болж, саяхан болсон жагсаал цуглааны үеэр ч нам гүм байсныг хэвлэлүүд “Бие нь тааруу байгаа”, “Намынхан нь түүнийг олны нүднээс хол бай гэсэн юм гэнэ” хэмээн тайлбарлаж байсан.
Юутай ч УИХ-ын гишүүн, засгийн газрын гишүүн, сайд, намынхаа гол албан тушаал Ерөнхий нарийн бичгийн дарга явсан энэ эрхэм төрийн түшээгийн албанаасаа өөрөө татгалзаж магадгүй байна.