УИХ-ын гишүүн У.Хүрэлсүх МАН-ын ерөнхий нарийн бичгийн дарга байсныхаа хувьд 2012 оны сонгуулиар намынхаа жагсаалтын хоёрт бичигдэж парламентын гишүүн болсон. Өнгөрсөн жил МАХН /өнөөгийн МАН/ нэрээ сольж нэрнээсээ коммунист үзлийн “Хувьсгалт“  гэдэг үгийг авах эсэх  талаар маргаан гарч байхад “Нам нэрээ сольсноос болж УИХ-ын сонгуульд ялагдвал хариуцлагыг нь би хар толгойгоороо үүрнэ” гэж хэлээд Монгол ардын нам болгож байсан. Гэсэн ч нам нь УИХ-ын сонгуульд ялагдахад тэрээр ямар ч үг хэлгүйгээр гишүүний тангаргаа өргөж, олны зүгээс “өнөө хариуцлага хүлээх чинь яасан бэ” гэсэн шүүмжлэл сонсч  байсан.
Тэр ч байтугай угийн тэмцэгч, намаа өмгөөлөн хамгаалагчийн хувьд УИХ-ын чуулганы хуралдаан дээр зөрөлдсөнөөс АН-аас сонгогдсон гишүүн Г.Баярсайхныг Төрийн ордонд барьж зодож, намаа л гэсээр өнөө хүрсэн. Тэр явдлаас хойш нам гүмхэн болж, олны өмнө харагдахаа больсон түүний тухай өвчтэй байгаа, эсвэл гэргийгээ гадаадад эмчлүүлсэн гэж  ч бичиж байсан. Үнэндээ ч толгойдоо тууз зангидан залуучуудыг уриалан жагсдаг тэрээр МАН-ын гишүүд дэмжигчид Сүхбаатарын талбайд жагсч, УИХ-д сонгогдсон гишүүд нь уриа лоозон бариад УИХ-ын чуулганы танхимын хаалгыг таглан сууж байхад ор сураггүй байсан билээ.
Харин өнөөдөр тэрээр Төрийн ордонд нэг үзэгдэхдээ л “Намайг УИХ-ын гишүүнээс чөлөөлж өгөөч” гэсэн хүсэлтээ өгч орхилоо.
У.Хүрэлсүхийн хувьд МАН-ын ерөнхий нарийн бичгийн даргаас гадна Засгийн газрын гишүүн, Онцгой байдлын сайд, Мэргэжлийн хяналтын газрын дарга гээд энэ засагт бас л чамгүй зүтгэсэн. Гэхдээ тэр өнөөдөр Монголын төрд ажиллахгүйгээр шийдэж. Магадгүй намынхаа өмнө хийсэн буруугаа хүлээж  ёстой нөгөө хариуцлагаа хүлээж тэртээ цагт Ерөнхий сайд асан Д.Бодоо шиг эгэл амьдралаар амьдрахыг шийдсэн байж болох.
Гэхдээ өөрийн байгуулсан “Шинэ дэлхий” телевиз, “Өдрийн шуудан” сониноо намынхаа хөрөнгөтөн Н.Номтойбаярт зарчихсан болохоор түүнийгээ эрхлээд сууна гэх зүйлгүй болж. Намдаа ямар нэгэн алба хашина гэхээр “сонгуульд ялагдсаны хариуцлагыг хар толгойгоороо хариуцаж” байгаа болохоор бараг л магадлал бага.
Г.Баярсайхан гишүүнийг Төрийн ордонд зодож байхдаа “Би хурандаа хүн” хэмээн агсамнаж байсан болохоор цэргийн газар ажиллаж болох. Гэхдээ цэргээ орхиод өчнөөн жил намчирхаж явсан түүнийг өнөөдөр хэн авах билээ. Ингээд юу хийх гэж байгаа хэрэг вэ. Төрийн ордны архан талд байрлах “Хүрээ төв”-ийнхөө нэг өрөөнд нам гүмхэн суугаад ном бичих үү. Зарим нэгний таамаглаад байгаачлан арай гадаадад гараад явчих гэж байгаа юм биш биз дээ.
У.Хүрэлсүх гэдэг хүн юу ч хийлээ гэсэн нэгэн цагт оросууд их өрийг тэглэсний дараа  “Орос шиг бай л даа” гэсэн үг дэлгэрсэн шиг одоо “Хүрэлсүх шиг бай л даа” гэсэн үг моодонд орох нь ээ.
Төрийн ордонд хүн зодож танхайрсан хүн буруугаа ойлгоод “Надад УИХ-ын гишүүн байх ёс суртахууны эрх алга” гэдэг юм бол Монгол Улсын хууль зөрчөөд, сонгуулийн үеэр мөнгө төгрөг, эд зүйл тарааж, одоо ч хуулийн байгууллагад шалгуулсаар байгаа /буруутайг нь тогтоогоод одоо прокурорын шатанд яваа/ нэр бүхий түшээд “У.Хүрэлсүх шиг бай л даа”.
Энэ үгийг Чойжилсүрэн, Ч.Хүрэлбаатар, Д.Хаянхярваа гээд олон хүнд хэлж болох байх аа.