УИХ-ын гишүүн У.Хүрэлсүх энэ парламентад нэгэн шинэ хуудсыг нээлээ. Үүнийг үнэлэхээс өөр яах билээ. УИХ-ын гишүүн болох гэж хэн хүнгүй үхэн хатан зүтгэдэг байтал У.Хүрэлсүх харин өөрийн хүсэлтээр гишүүний бүрэн эрхээсээ татгалзаж байгаа нь олонд сургамж болохоор үйлдэл болж байгааг гадуур нэг шуугиж байна. Цахимаар ч тэр түүнд талархсан, өхөөрдсөн хүн олон байна. Гэвч гишүүний бүрэн эрхээсээ татгалзах болсон шалтгаан нь өөр учиртай бололтой.
Уншигчид маань санаж байгаа байх. МАХН-ын дарга Н.Энхбаярыг гэрээс нь цагдаа, хүчнийхэн барьж, хүрэн оймстой хөлийг нь гозолзуулаад аваад явсныг. Тэгвэл хууль хяналтынхан түүнд “хүрэн оймсоо бэлтдээд байж бай” гэж хэлсэн юм байх.  Товчхондоо түүний хууль зөрчсөн үйлдлүүд нь зузаарсаар УИХ-ын чуулганы танхимд бус өргөст торны цаана суулгахад хүрсэн гэнэ. Хамгийн ойрын жишээ л гэхэд “Зоос” банкны 14 тэрбум төгрөгтэй холбоотой хэрэг сэдэрсэн юм байх. Үүнээс гадна түүний нэр холбогдсон болгон сэдэрсэн аж. Хэрэг хуучирдаггүй гэдэг нь л болж байгаа юм байх, товчхондоо. Дарин дээр давс гэгчээр ийн бүх асуудал нь сэдрээд байтал УИХ-ын гишүүн Г.Баярсайханыг шанаадсан хэрэг нь ч эрүүгийн хэрэгт тооцогдож сэтгэлийг нь зовоож байгаа сурагтай.
Түүний өмнөөс шоронд суусан Чимэдцэрэн суллагдаж байгааг ч цахимаар ярьж байна. Тэгэхээр эрхэм гишүүн хүрэн оймсоо бус эсгий гутлаа бэлдээд гэртээ хүлээж байхаар зэхэж УИХ-ын гишүүнийхээ бүрэн эрхээс татгалзах өргөдлөө өгч байгаа юм байна. УИХ-ын гишүүн байж цагдаагийнханд хөлөө гозолзуулаад баригдах нь ичгэвтэр хэрэг гэж бодсоноос үүдэн ийн шийдвэр гаргаж байгаа бололтой.