Чингис хааны мэндэлсэн өдрийг 11 дүгээр сарын 14 хэмээн тогтоож, амралтын өдөр болгох тухай Монгол Улсын Ерөнхийлөгчөөс оруулсан тогтоолын төслийг УИХ-ын чуулганаар хэлэлцэх үед эрхэм түшээ Ц.Нямдорж ганц үнэн юм хэллээ.
Тэрээр “Намайг УИХ-ын дарга, Н.Энхбаярыг Ерөнхийлөгч байхад зургадугаар сарын 1-нд Чингис хааны төрсөн өдөр гээд талбай дээр бүгдээрээ гарч суугаад л их ёслол төгөлдөр тэмдэглэж байсныг би санаж байна. Гэтэл одоо Ц.Элбэгдоржийг Ерөнхийлөгч болохоор л 11 дүгээр сарын 14-нд төрсөн болчихдог нь ямар учиртай юм бэ. Тэгэхээр зүгээр л Чингис хааны өдөр гээд тэмдэглэдэг байвал яасан юм бэ” гэж УИХ-ын чуулганы хуралдаан дээр хэлж байна.
Үнэхээр тэмдэглэлт өдрийг заавал Чингис хаантай холбох гээд л байгаа бол зүгээр л Чингис хааны өдөр ч юм уу, бахархлын өдөр гээд тэмдэглэдэг, энэ өдөр нь нийтээрээ эзэн хааныхаа тухай, дурсдаг, тэр одон шагналыг нь гардуулдаг байхад яагаад болохгүй гэж.
Чухамдаа найман зууны тэртээ Тэмүүжин хүү яг хэзээ төрснийг хэн яг, яс тогтоож чадсан юм бэ. Өнөөдөр улс даяараа Чингисээр өвчилж, хажуу дэргэд нь сууж байсан, ярьж хөөрөөд байж байсан, бүр эхээс төрөхөд нь дэргэд нь байсан хүн шороон түм болсон өнөө үед  төрсөн өдрийг нь хэн яг тогтоож байгаа юм. Үнэхээр эрхэм гишүүн Ц.Нямдоржийн хэлсэнчлэн “Н.Энхбаярыг Ерөнхийлөгч байхад зургадугаар сарын 1-нд төрсөн болдог, Ц.Элбэгдоржийг Ерөнхийлөгч болохоор арваннэгдүгээр сарын 14-нд төрсөн болдог байж таарах уу. Тэгээд дараа бас нэг өөр ерөнхийлөгч гараад ирэхээр бас нэг өөр өдөр төрсөн болох уу.
Үнэндээ яг энэ хүмүүс /Н.Энхбаяр, Ц.Элбэгдорж/ өөрсдөө ингэж төрсөн өдөр, цаг нарыг нь тогтоогоод байна уу, хажуу дэргэдээс нь зусарч зулгуйч улсууд эзэн хааны төрсөн өдрийг яг ингэж Ерөнхийлөгчийнхөө  төрсөн өдөртэй таарч байгаа мэтээр сурталдаж ойлгуулаад байна уу.
Тэр зөвлөхүүд нь юу хийж байна. Тэгээд ч Чингис хаанд цахим үнэмлэх олгох гээд л байгаа юм биш бол Монгол газраа, монгол эхээс төрж, Монгол улсаа байгуулж явсан тэр хүний яг төрсөн өдөр, цаг, эх барьж авсан хүнийг нь яс тогтоох гээд байхын хэрэг юун билээ. Ц.Нямдорж гишүүний хэлж байгаагаар нэг өдөр товлоод л түүнийгээ “ЧИНГИС ХААНЫ ӨДӨР” гээд тэмдэглэдэг, бахархдаг байвал яасан юм бэ.