“Баянгол дүүргээ өөрийн вант улс болгох гэж байна” хэмээн хэл ам таталсан УИХ-ын гишүүн, Хүн амын хөгжил, нийгмийн хамгааллын сайд С.Эрдэнийг тойрсон асуудал дахин хөндөгдөж эхэллээ. Баянгол дүүргийн МАН-ын хорооноос тус дүүргийн ИТХ-д нэр дэвшигчид өнөөдөр хэвлэлийн хурал хийж АН-аас орон нутгийн сонгуульд С.Эрдэнэ гишүүнтэй хамааралтай 14 хүн нэр дэвшээд буй талаар мэдээлэл өгсөн юм. Тэдний хэлж байгаагаар Баянгол дүүрэгт түүний гишүүний эхнэр, хүүгээс эхлээд бие төлөөлөгч, туслах нь хүртэл Баянгол дүүрэгт нэр дэвшээд байгаа аж. Үндсэн хуульд хүн болгон сонгох, сонгогдох эрхтэй хэмээн заасан ч УИХ, Засгийн газрын гишүүн хамаатан, садныхаа хүмүүсийг дэвшүүлж байгаа нь дэндүү ёс зүйгүй үйлдэл хэмээн шүүмжилж байлаа.
Тиймээс Баянгол дүүргийн ИТХ-д МАН-аас нэр дэвшигчид С.Эрдэнийн хамааралтай бүх хүмүүсийг халз мэтгэлцээнд дуудаж буйгаа дуулгав. Мэтгэлцээнийг энэ сарын 19-нд олон нийтэд нээлттэй явуулах хүсэлтэй буйгаа ч хэлэв.