Хөвсгөл аймгийн Сонгуулийн хороо орон нутгийн сонгуульд МАХН, МҮАН-аас нэр дэвшигчдийг бүртгээгүй. Тиймээс эдгээр намаас гурван хүн өнгөрсөн долоо хоногт өлсгөлөн зарласан юм. Тус аймгийн МАХН-ын мянгатын дарга н.Пүрэв-Осортой холбогдож, энэ талаар зарим зүйлийг тодрууллаа.
 
-Аймгийн Сонгуулийн хорооны гаргасан шийд­вэрийг эсэргүүцэж, гурван хүн өлсгөлөн зарласан. Тэдний бие ямар байна вэ?
-МАХН-аас нэг, МҮАН-аас хоёр хүн аймгийн Сонгуулийн хорооны хууль бус шийдвэрийг эсэргүүцэж, өлсгөлөн зарласан юм. Сонгуулийн хороотой зөвшилцөлд хүрсэн учир тэд 108 цагийн буюу дөрөв хоногийн дараа өлсгөлөнгөө зогсоосон. Тэд одоогоор аймгийн нэгдсэн эмнэлэгт эмчлүүлж байгаа. Гурван хүний нэгийнх нь бие хүнд байна.
-Сонгуулийн хороотой ямар зөвшилцөлд хүрсэн юм бэ?
-Аймгийн Сонгуулийн хороонд өлсгөлөн зарласан хүмүүсийн эрүүл мэндийг бодож, аймгийн Захиргааны хэргийн шүүхэд гаргасан давж заалдах гомдлоо татаж авъя, МАХН, МҮАН-аас нэр дэвшигчдийг бүртгэх тухай анхан шатны шүүхийн шийдвэрийг биелүүлэх зөвшилцөлд хүрсэн. Хамгийн гол нь, СЕХ-ноос саналын хуудас дахин хэвлэж болох эсэх тухай хариу хүлээж байна.
Сонгуулийн хороо анхан шатны шүүхийн шийдвэрийг хэрэгжүүлэхгүй саналын хуудсаа хэвлүүлсэн буруугаа зөвшөөрсөн. Тиймээс одоо саналын хуудас дахин хэвлүүлэх арга хайж байна.
-Сонгууль болоход хэдхэн хоног үлдлээ. СЕХ саналын хуудас дахин хэвлэж, тарааж амжих болов уу?
-Саналын хуудас дахин хэвлэж болох эсэх талаар СЕХ шийдвэр гаргах байх. Тэгээд ч сонгуулийн санал авах өдрөөс гурав хоногийн өмнө саналын хуудсыг бүх хэсгийн хороо, штабт хүргүүлнэ гэсэн заалт  хуульд байгаа юм билээ. Тэгэхээр МАХН, МҮАН-аас нэр дэвшигчдийн нэрийг оруулж, саналын хуудсыг дахин хэвлэж болно гэж бодож байна.