Нийслэлийн өмчийн харилцааны газар нийслэлийн МАН-ын түрээсийн байртай холбогдуулан МАН-ын Ерөнхий нарын бичгийн дарга Г.Занданшатараас 800 орчим сая төгрөг нэхэмжилж, өнөөдөр Сүхбаатар дүүргийн шүүхэд өгчээ. Тус намынхан нийслэлийн өмчийн байрыг багагүй хугацаанд түрээслэсэн. Ингэхдээ сүүлийн хэдэн сар түрээсийнхээ мөнгийг огт төлөөгүй гэнэ. Нийслэлийн өмчийн харилцааны газрын мэргэжилтнүүд түрээсийн мөнгө төл хэмээн гурван ч удаа хандаж, удирдлагуудтай нь хүртэл уулзсан байна. Гэсэн ч тэд өнөөдрийг хүртэл түрээсийн төлбөр болох 490 сая төгрөг төлөөгүй гэдгийг Нийслэлийн өмчийн харилцааны газрын дарга Ш.Төмөрбаатар хэллээ. Тиймээс түрээсийн мөнгөнөөс гадна бусад зардлыг ч тооцоод 800 сая төгрөг нэхэмжилж шүүхээс өгөхөөс өөр арга байгаагүй гэнэ.
Ш.Төмөрбаатар “Ер нь өнгөрсөн хугацаанд МАН шиг ийм өндөр түрээс төлөлгүй явсан түрээслэгч Нийслэлийн өмчийн харилцааны газарт бүртгэгдээгүй. Улс төрийн нам гэхээр бусад байгууллагаас ялгаатай байх ёсгүй. Нийслэлийн өмчийг хэрэглэсэн, түрээслэсэн төлбөрөө төлөх нь зүйн хэрэг. Аль нам, улс төрийн хүчин байх нь чухал биш. Энэ хугацаанд хянадаг шалгадаг газар нь юу хийж байсан юм. Аудит хаана байсныг одоо асуух хэрэгтэй л болж байна. Гол нь зах зээлийн нийгмийн зүй ёсны харилцаагаар л асуудалд хандана. Тиймээс МАН нийслэлийг гомдолгүй, хохиролгүй болгох ёстой” гэв.