Авлигатай тэмцэх газрынхан УИХ-ын ээлжит сонгуулийн дараа О.Чулуунбатад холбогдох хэргийг түр түдгэлзүүлсэн байсныг нь сэргээлгэж, шалгасан юм. Учир нь, түүний УИХ-ын гишүүний бүрэн эрхийг түдгэлзүүлж өгөөгүйгээс хэргийг шийдвэрлэх ажил гурван жил орчим гацаанд байлаа. Харин өдгөө түүнд холбогдох хэргийг Нийслэлийн прокурорын газарт яллах дүгнэлт үйлдэхээр хянаж байна. Хавтаст хэргийг тус газарт шилжүүлснээс хойш сар гаруй хугацаа өнгөрчээ. Прокурор хавтаст хэрэгтэй танилцах хуулийн хугацаа дуусч байгаа учир удахгүй харьяаллын дагуу Чингэлтэй дүүргийн шүүхэд шилжүүлэх гэнэ.

Хууль хяналтынхан О.Чулуунбатыг Монголбанкны ерөнхийлөгч байхдаа албан тушаалаа хэтрүүлэн ашиглаж, Монголбанкны Валютын газрын захирал асан Ц.Одонгуатай бүлэглэн тус банкнаас 11 тэрбум 690 сая, “Стоунлей Интернэшнл” компанийн захирал Жорж Чайлмерстэй хамтран 24 тэрбум 834 сая гаруй төгрөг завшсан гэж буруутгаж байгаа юм.
О.Чулуунбат өдгөө Эдийн засгийн хөгжлийн дэд сайдаар ажиллаж байгаа. Прокурор түүнийг буруутай гэж үзвэл дэд сайдын албан тушаалаас түдгэлзүүлж ч мэдэх нь.