“Сонор рекордс”-ын захирал Бат-Үүлийн Чулуудай өнөөдөр хэвлэлийнхэнд хандаж “Эрдэнийн төгөл” хотхоны талаар мэдээлэл өглөө. Тэрээр, МАН-ын сурталчилгаа болгож, улс төр хийж байгаа “Эрдэнийн төгөл” хотхон миний аавтай огт холбоогүй ээ. Хэвлэл мэдээллийн хэрэгслээр ИТХ-ын тэргүүлэгч гишүүн Д.Амарбаясгалан “Бат-Үүл хотын дарга болмогцоо хүүгийнхээ компанид газар олгож, энэ хотхоныг барьж эхлүүлсэн гэх мэдээлэл тарааж аавын маань нэр хүндэд халдаж, улс төр хийж байна. Энэ мэдээлэл ташаа гэдгийг хэлэх гэж би энд ирсэн юм. Энэ хотхоны газрыг би 2007 онд тухайн үеийн хотын дарга Ц.Батбаяраас авч байсан. Газар авах хүсэлтээ 1998 онд өгч, удаа дараа буцаасны эцэст 2007 онд шийдэгдсэн. Энэ газар нь барилгын хог хаягдалд дарагдсан газар байсныг бид цэвэрлэж авсан. Ингээд өвөөгийнхөө дурсгалд зориулж энэ цогцолборыг барьж байгаа юм” гэлээ.
Түүний хэлснээр энэ цогцолборыг барихад Хотын дарга Э.Бат-Үүлийн оролцоо нэгээхэн ч байгаагүй гэнэ. “Эрдэнийн төгөл” цогцолборт нь орон сууц, соёлын төв багтах аж. “Сонор рекордс”-ын захирал Б.Чулуудай аавынхаа нэр хүндийг бодож өөрийнхөө хийж байгаа ажлыг ил тод явуулна гэдгээ хэлсэн юм. Б.Чулуудайгийн  хувьд “Сонор рекордс”компанийг 100 хувь эзэмшдэг юм байна. Түүнээс гадна хөдөө аж ахуй, мал аж ахуй, хөрөнгийн зах зээл,хөрөнгө оруулалтын чиглэлийн бизнес эрхэлдэг гэдгээ хэвлэлийнхэнд хэлсэн юм.
Түүнээс дараахь асуултад хариу авлаа.
-Энэ цогцолбор барилга Улаанбаатар хотын ундны цэвэр усны бүсэд баригдаж байгаа юм биш үү. Оргил рашаан сувилалд хэт ойрхон байгаа гэсэн?
-Зурагтаар Амарбаясгалан төлөөлөгч тэгж ярьж байна лээ. Тийм биш ээ. Хуулийн дагуу, Ц.Батбаяр даргын зөвшөөрлөөр авсан.
-Танай аав бизнест тань оролцдог уу. Хотын дарга болсон хойноо газар олгосон гэж тайлбарлаж байсан?
-Энэ газрыг бид 1998 онд авах хүсэлтээ тавьсны эцэст 2007 онд газар олгосон гэдгийг би хэлсэн шүү дээ. Миний аав бидний бизнест огт оролцдоггүй. Би эрхэлж байгаа бизнесийнхээ талаар тодорхой хэлсэн. Үүнд аав маань огт хамаагүй. Гэхдээ аав маань нэг зүйлийг хэлдэг юм. Хуулийн дагуу үйл ажиллагаа явуулаарай гэж. Бид огт хууль зөрчөөгүй. “Сонор рекордс” компани 1996 оноос үйл ажиллагаагаа явуулж байгаа. Миний аав бидний бизнест огт оролцдоггүй. Харин хуулийн дагуу л үйл ажиллагаа явуулаарай гэж захидаг.
-Барилга хэзээ ашиглалтад орох вэ. Газрын зөвшөөрлийг хэдэн жилээр эзэмшиж байгаа юм бэ?
-Цогцолбор ирэх онд дуусах ёстой. Газрыг 10 жилээр эзэмших эрхтэй.
-НИТХ-ын төлөөлөгч Д.Амарбаясгалан тэгэхээр танай аавыг гүтгэсэн байж таарах. Тэгвэл таны хувьд энэ асуудлыг цаашид хэрхэх вэ?
-Шүүхэд хандана.