СЕХ-ноос орон нутгийн сонгуульд иргэдийг хамруулж, санал өгүүлэх зорилгоор болзошгүй аюулын зардал хэмээн 180 сая төгрөг төсөвлөж, Улаанбаатар, Дархан, Эрдэнэт, Говьсүмбэрээс бусад аймагт дээрх мөнгийг хуваарилсан гэх. Гэтэл зарим аймагт өвөлжилт хүндэрч малчид санал өгөх нь битгий хэл, малаа бэлчээхэд бэрх болоод байгаа юм байна. Одоогийн байдлаар монгол орны нийт нутгийн 70 гаруй хувь нь цасан бүрхүүлтэй байгаа гэнэ. Үүнээс Хөвсгөл аймгийн хойд сумдад 80 см орчим цасан бүрхүүлтэй байгаа бол Булган аймгийн гурван суманд өвөлжилт хүндрэх төлөвтэй байгаа гэнэ. Энэ тухай аймгийн Засаг дарга М.Оюунбат хэлэхдээ “Өвөлжилт хүндрэх төлөвтэй байна. Манай аймгийн гурван сумын малчид лав энэ удаагийн орон нутгийн сонгуульд санал өгөх боломжгүй болж байна” хэмээж байна.