МАН-ын удирдах зөвлөл өнөөдөр Тусгаар тогтнолын ордонд хуралдаж байгаа юм байна. Тэд Өвөрхангай аймгийн 10 дугаар тойрогт МАН-аас нэр дэвшиж ялсан ч шүүхийн шийдвэрээр ялагдал хүлээчихээд буй С.Чинзориг, Н.Төмөрхүү нарын асуудлаар хуралдаж байгаа юм. АН-аас энэ тойрогт нэр дэвшиж, тэдэнтэй өрсөлдсөн Г.Батхүү, Д.Зоригт нарын хувьд тэднийг насанд хүрээгүй хүүхэд сонгуулийн сурталчилгаанд ашигласан гэдэг үндэслэлээр шүүхэд өгсөн. Харин Өвөрхангай аймгийн Анхан шатны шүүхээс С.Чинзориг, Н.Төмөрхүү нарыг насанд хүрээгүй хүүхдийг сонгуулийн сурталчилгаанд ашигласан нь хууль зөрчсөн үйлдэл хэмээн тэдний УИХ-ын гишүүний түр үнэмлэхийг хүчингүйд тооцсон. Тиймээс СЕХ-ноос Г.Батхүү, Д.Зоригт нарыг УИХ-ын гишүүнээр сонгогдсонд тооцож, тэдний нэрийг УИХ-ын даргад өргөн мэдүүлээд буй. УИХ-ын Тамгын газраас ирэх пүрэв гаригт тангараг өргүүлэхээр бэлтгээд байгаа нь ч нууц биш болсон. Тэгвэл үүнийг эсэргүүцэж С.Чинзориг өлсгөлөн зарлахаа мэдэгдлээ. Түүнээс энэ талаар тодруулахад, “Би өнгөрсөн долоо хоногт хэвлэлд ярилцлага өгөхдөө хууль бус шийдвэрийн эсрэг өлсгөлөн зарлана гэж хэлсэн юм. Үүнийг хүмүүс хүлээж авсан байх. Би үнэхээр өлсгөлөн зарлахад бэлэн байна. Г.Батхүү, Д.Зоригт нар ичихгүй бол би ч ичихгүй” хэмээсэн юм.  Харин Н.Төмөрхүүгийн хувьд төдийлэн хэвлэлийнхний нүдэнд өртөхгүй байгаа юм.