УИХ дахь МАН-ын сул гишүүд хэзээ бүлэгтэй болж нэгдсэн зохион байгуулалтад орох вэ гэдэг асуудал тодорхойгүй байна. Уг нь, Ерөнхийлөгчөөс УИХ-ын дэгийн тухай хуульд нэмэлт өөрчлөлт оруулах тухай хуулийн төслийг УИХ-ын даргад өргөн мэдүүлсэн. “Энэ хуулийг хэлэлцэх хугацаа хангалттай байсан ч хэлэлцэлгүй өдийг хүрлээ. УИХ дахь олонхийн бүлэг биднийг албан ёсны бүлэгтэй болохыг эсэргүүцэж байна” гэж МАН-ын гишүүд байр сууриа илэрхийлж буй. Тэгвэл энэ хуулийг УИХ-ын Төрийн байгуулалтын байнгын хорооны хуралдаанаар хэлэлцэх ёстой байсан ч хойшиллоо. Тус байнгын хороонд харьяалалтай гишүүдийн олонх нь хөдөө, орон нутаг болон гадаадад томилолттой яваа гэсэн шалтгаанаар хойшлов. Хэдийгээр УИХ-ын сул гишүүн хэмээн нэрлэгдэж байгаа МАН-ын гишүүн Н.Энхболд, Д.Оюунхоролоос бусад нь энэ хуралд ирээгүй байв. Ийн МАН-ын бүлгийг байгуулах эсэхийг шийдэх байнгын хорооны хуралдааны ирц хүрээгүйгээс дахин хойшиллоо.