Баянгол дүүргийн шүүхэд өнөөдөр УИХ-ын сонгуулиар Увс аймгийн Тариалан сумын Бургастай багийн малчдын гэрийг 100 мянган төгрөгөөр түрээсэлж, ухуулах байр болгох нэрийдлээр сонгогчдод мөнгө тараасан хэрэгт буруутгаад буй  УИХ-ын гишүүн Б.Чойжилсүрэн, Ч.Хүрэлбаатар нарын  бие төлөөлөгч Т.Гансүх, Л.Жамсран, н.Лхагва нарт холбогдох шүүх хурал болно. Тэднийг энэ сарын 20-нд шүүх байсан ч өмгөөлөгч нь Увсад болсон шүүх хуралд оролцсон тул өнөөдрийг хүртэл хойшлуулаад байсан юм.
Эрүүгийн хуульд бусдыг хуурч мэхлэх, эд мөнгөөр татах, санал худалдаж авах зэргийг үйлдсэн этгээдийг тодорхой албан тушаал эрхлэх, үйл ажиллагаа явуулах эрхийг нь хоёр жил хүртэл хугацаагаар хасч, хөдөлмөрийн хөлсний доод хэмжээг 71-100 дахин нэмэгдүүлсэнтэй тэнцэх хэмжээний төгрөгөөр торгох, эсвэл 3-6 сар хүртэл хугацаагаар баривчлах ялаар шийтгэхээр заажээ.