МАХН-ын Гүйцэтгэх товчоо өчигдөр хуралдаж намынхаа гишүүдийг Засгийн газраас гарахыг шаарджээ. Гүйцэтгэх товчооны хурлын талаар УИХ-ын гишүүн О.Баасанхүүгээс тодруулахад, “Гүйцэтгэх товчооны хуралд манай намын бүх сайд болон бусад гишүүн очсон юм билээ. Хурлаар ярьсан асуудал нь сүүлийн үеийн хэлмэгдүүлэлт. Зөвхөн Н.Энхбаяр даргатай ч холбоотой асуудал биш, маш олон хүн хэлмэгдэж байна. Тухайлбал, Хөвсгөл, Говь-Алтай, Налайх, Сүхбаатар дүүрэгт олон хүн хэлмэгдсэн. Ийм хэлмэгдүүлэлт байсаар байхад МАХН нэг засагт ороод явж байгаа нь буруу гэсэн шүүмжлэл яригдсан” гэв. Тэрээр хэлэхдээ МАХН, Шударга ёс эвсэл засгаас гарах нь буруу, гарах хэрэггүй гэдэг байр суурьтай байгаагаа хэлсэн.
Хэрэв эвсэл засгаас гарлаа гэхэд улс төрд тогтворгүй, төвөгтэй байдал үүснэ. АН-ын дунд фракцуудын зодоон болно гэдгийг ч тэрээр хэлсэн юм.