Үндсэн хуулийн цэцэд нэр бүхий иргэн Монгол Улсын 2012 оны төсвийн тухай хуулийн 1 дүгээр хавсралтаар батлагдсан “Монгол Улсын төсвийн хөрөнгөөр 2012 онд хэрэгжүүлэх хөрөнгө оруулалтын төсөл, арга хэмжээ, барилга байгууламжийн жагсаалт”-ын зарим заалт Төсвийн тухай хуулийн холбогдох заалт болон Үндсэн хуулийг ноцтой зөрчсөн гэж мэдээлэл ирүүлжээ.
УИХ-аас Монгол Улсын 2012 оны төсвийн тухай хуулийг батлан гаргахдаа тодорхой нэг компанид ялгавартай хандан, төсвийн орлогыг тусгайлан хуваарилан зааж, хэд хэдэн төсөл, арга хэмжээг гүйцэтгүүлэхээр хуульчлан баталсан нь Үндсэн хуульд заасан шударга ёс, хууль дээдлэх зарчмыг алдагдуулсан байна гэж тэрээр үзсан байна.
Үндсэн хуулийн цэц энэхүү мэдээллийн дагуу  үүсгэсэн маргааныг хянан шийдвэрлэх дунд суудлын хуралдаанаа энэ сарын 12-нд нээлттэй хийхээр болжээ.