МАХН Засгийн газраас гарахаар болсон тухай улс төрийн бусад намуудын төлөөлөл ямар байр суурьтай байгааг сонслоо.

-МАХН-аас сонгогдсон гишүүд Засгийн газраас гарах тухайгаа мэдэгдлээ. Үүнд та хувь хүнийхээ хувьд ямар бодолтой явна вэ?
-Хамтарсан Засгийн газраас МАХН-ынхан гарвал муу үр дагавартай. Гадаад, дотоодын хөрөнгө оруулагчид эргэлзэхэд хүрнэ. Дотоодод инфляц бий болно. Эцсийн дүндээ ард түмний нуруун дээрх ачаа л нэмэгдэнэ шүү дээ. Улс төрийн тогтворгүй байдал үүснэ. УИХ-ын даргыг сонгох үеэр дөрвөн сарын өмнө  “Мордохын хазгай болж байна” гэж би хэлж байсан шүү дээ. Зан ааш нь таарахгүй эхнэр нөхөр хоёр шиг МАХН-МҮАН-ын “Шударга ёс” эвсэл АН-тай нийлж засаг байгуулсан. МАХН-ын Гүйцэтгэх товчоо хуралдаж засгаас гарах шийдвэр гаргасан нь үнэн юм билээ. Тэгэхдээ  хоёр нам эвсч гэрээ байгуулсан байх. Тэр гэрээндээ юу гэж заасан байдаг юм. Дангаараа шийдвэр гаргах эрх  МАХН-даа байна уу үгүй юу. Гэхдээ МАХН-ынхан ийм шийдвэр гаргаж байгаа нь муу зүйлийн эхлэл гэж хэлмээр байна. Засаг хоорондоо учраа олохгүй. Цөөнхтэйгээ зөвшилцөж чадахгүй ийм л нөхцөл байдал үүсч эхэллээ.
-УИХ-д  МАН-аас сонгогдсон гишүүд өнгөрсөн долоо хоногт чуулганы хуралдаанаа тасалсан. Энэ долоо хоногт хуралдаа суух уу?
-АН-ын  гадаад руу явсан гишүүдийг нөхөх гэж  МАН-ын гишүүд чуулганы хуралд суухгүй. Өнгөрсөн долоо хоногт УИХ-ын чуулганы хуралдаанд МАН-ын гишүүд оролцоогүй гэж буруутгаж байна. Чуулганаар чухал асуудал хэлэлцэх бол бид оролцоно. Түүнээс биш маргаан нь шүүхээр эцэслэн шийдэгдээгүй зарим гишүүдийн тангараг өргөх асуудлыг хэлэлцэх бол хуралдаанд оролцохгүй. Тэгэхээр энэ долоо хоногт чуулганы хуралдаанаар хэлэлцэх асуудлыг нь харж байж хуралд орох эсэхийг шийднэ.