МАХН өөрийнхөө гишүүдийг Засгийн газраас гаргана гэж мэдэгдэж.  Шалтгаан нь ердөө л Шинэчлэлийн Засгийн газар улс төрийн хэлмэгдүүлэл явуулж байна гэнэ. Энэ нь тус намын дарга Н.Энхбаярыг хэд хэдэн үндэслэлээр анхан шатны шүүхээс дөрвөн жилийн ял өгсөнийг хэлж байгаа нь энэ.
Чухамдаа Засгийн газарт орсон гишүүдээ татах маягаар дарамт үзүүлж Намбарын Энхбаяр гэдэг хүнийг  ялаас мултрах гэсэн арга. Уг нь бол түүний буруутай үйлдэлд Засгийн газар биш Монгол Улсын шүүх ял өгсөн билээ.  
Хамгийн гол нь энэ бүхнийг хийж байгаа хүн нь Н.Удвал ч биш, Д.Тэрбишдагва ч биш, Ц.Батцэрэг бүр ч биш. Энэ бүхнийг ердөө л энэ намын дарга Н.Энхбаяр гэдэг хүн хийж байгаа хэрэг.

Н.Энхбаярын тухайд төрийг самарч, Засгийн газрыг огцруулж сурсан, энэ талаар арвин туршлагатай нэгэн.
1990-ээд оны эхээр Монгол Улсын Засгийн газрын гишүүн Соёлын сайд байсан Н.Энхбаяр 1996 онд УИХ-ын сонгуулиар Ардчилсан хүчин ялж Засгийн эрх авсны дараахан 1997 онд нөхөн сонгуулиар Н.Багабандийн оронд Завхан аймгаас  сонгогдон УИХ-д орж ирсэн. Хууль тогтоох дээд байгууллагад орж ирсэн даруйдаа л М.Энхсайханы Засгийн газрыг огцрууллаа.

Дараа нь Ц.Элбэгдоржийн, тэгээд Ж.Наранцацралтын Засгийн газрыг яг нэг жилийн мөчлөгтэйгээр огцруулах ажлыг чухамдаа өөр хэн ч биш Н.Энхбаяр гэдэг хүн хийсэн. Ингэж энэ засгийн газруудыг самарч огцруулснаараа өөрсдөө, МАН-ынхан санасандаа хүрч төрийн эрхийг авсан ч үнэндээ улс оронд хийх ёстой байсан олон шинэчлэлийг чөдөрлөн саатуулж хойш нь татсан.
Хийх гэж байсан олон чухал шинэчлэлийн ажлыг нь саатуулан чагталж байсан атлаа өөрсдөө УИХ-д 72 суудалтай болсон хойноо баталж авторын нэр зүүсэн. Тухайлбал газрын тухай хуулиудыг  МАН, /тэр үеийн МАХН/-ын гишүүд бойкотолж батлуулахгүй байсан атлаа 2001 онд өөрсдөө баталж үүгээрээ одоо ч сайрхсаар яваа. Энэчлэн МАН 1996-2000 онд  УИХ-ын чуулганы хуралдааныг 150 орчим удаа хаяж, завсарлага аван саатуулан чагталж энэ төрийн ажлыг, Монгол Улсын хөгжлийг чөдөрлөж байсан юм.

Энэ бүхэн ердөө л 2000 оны сонгуулийн сурталчилгаандаа “Энэ ардчиллынхан гарч ирээд юу ч хийгээгүй шүү дээ. Та нар харж байна уу, амьдрал сайжраагүй байгаа биз дээ. Зүгээр л бие биенээ огцруулаад байсан” гэх гэсэн хэрэг. Тэгэж ч сурталчилж байж УИХ-ын сонгуулиар 72 суудал авч байсан.
Чухамдаа МАХН-ын 72 хүн л хууль тогтоох дээд байгууллагын зөөлөн сэнтийд заларснаас биш өнгөрсөн 12 жилд Монголын нийгэмд өөрчлөлт гараагүй.
Одоо яг 15 жилийн дараа түүх давтагдаж байна. Тэгэх тэгэхдээ нэг хүний сэдлээр яг ижил байдлаар давтагдаж байна. 15 жилийн өмнө ч Н.Энхбаяр гэдэг хүн МАХН-ын дарга л байсан, одоо ч мөн л  МАХН-ын дарга. Ялгаа нь 15 жилийн өмнө Н.Энхбаяр гэдэг хүн хууль тогтоох дээд байгууллага-УИХ-ын гишүүн нь байж дотроос нь үймүүлж байсан бол одоо алсаас, шоронгоос удирдаад энэ бүхнийг хийж байна.

Өнөөдөр Засгийн газраас МАХН-ын гурван сайд гарна гэдэг бол Шинэчлэлийн Засгийн газар бүрэлдэхүүнээрээ огцорно гэсэн үг.
Үүнд ташуур өгч байгаа хүчин бас бий. Тэр нь МАН. 90 жилийн түүхтэй гээд байдаг МАН-ын хувьд өнөөдөр хэдэн дарга нар нь Засгийн эрхэнд гарч л байвал цаана нь улс орон хохирч байна уу, үгүй юу, ард түмэн яаж амьдарч байна гээд олон асуудал чухамдаа огт хамаагүй. МАН-ын эрх мэдэлтнүүдийн хувьд яг одоо “Энэ ардчиллынхан, Шинэчлэлийн Засгийн газар биднээс илүүг хийчих вий, олон түмний дунд нэр хүнд нь дээшилчих вий” гээд яаж буруугаар эргүүлэх вэ, хэрхэн огцруулж нэр хүндийг нь унагах вэ гээд ёстой шээс нь гоожих гээд сууж байгаа. Үүнээсээ болоод чөтгөртэй ч нийлэхэд бэлэн байгаа болохоор МАХН, Н.Энхбаярыг далдуур уухайлан дэмжиж ёстой л “хормойгоороо сэвээд” сууж  байна.

Ер нь аажимдаа МАХН-ыг төрхөмдөө буцааж аваад олонхи болчихвол трөийн толгойд гараад занхайчихад бэлэн байгаа улс.
Юутай ч Н.Энхбаяр гэдэг хүн хэзээний сурсан зангаараа монголын төрийг дахиад самарч эхэллээ. Үр дүн нь яаж гарах нь вэ, харж л байя. Уг нь монголчууд “ажил хийвэл дуустал, давс хийвэл уустал” гэдэг ард түмэнсэн.
Бүрдээд гуравхан сар гаруй болж байгаа энэ Засгийн газрын хийж эхлүүлсэн олон ажлыг МАН-ын эрх баригчдаас бусад нь, олон нийт тун таатай хүлээж авч, заримынх нь үр дүн гараад байгаа юмсан.