МАХН-ын дэд дарга, Шадар сайд Д.Тэрбишдагва дөнгөж сая хэвлэлийнхэнд хандаж мэдэгдэл хийлээ. Тэрээр, “МАХН-МҮАН-ын  “Шударга ёс” эвсэл нь АН болон ИЗНН-тай эвсэл байгуулахдаа Монгол Улсад шударга ёсыг нэн тэргүүнд тавихаар болсон. Гэтэл хэлмэгдүүлэлт газар авч ялгаварлан гадуурхах байдал гарч авч байна. Орон нутгийн сонгуулиар МАХН-ыг бүртгэхгүй байх, хасах зэргээр хавчин гадуурхлаа. Үүнийг таслан зосгоох ёстой. 8000 гаруй хүн мандат авах ёстой байсан. МАХН-аас 2000 гаруй хүн нэр дэвшсэн. Энэ нь нийт нэр дэвшигчдийн 30 хувь нь сонгуульд оролцсон гэсэн үг. Гуравхан хоног сурталчилгаа явуулсан. Энэ мэтээр хавчин гадуурхаж байна. Түүнчлэн саналын олон хуудас хүчингүй болсон. Сонгинохайрхан дүүрэгт л гэхэд 9000 саналын хуудас хүчингүй болгосон. Говь-Алтай, Хөвсгөл, Налайх дүүргийн сонгуулийн тойргийн хороо манай намаас нэр дэвшигчдийг бүртгэж авахаас татгалзсан. Үнэмлэх олгосон ч нэрийг нь саналын хуудас дээр мартаж бичсэн. МАХН-ыг дугуйлан будахад бусад намын нэр гарч ирсэн. УИХ-ын сонгуульд Н.Энхбаяр, Авирмэд, Нарангэрэл, Батшугар, Ойдов нарыг хууль бусаар хассан. Энэ нь улс орны төлөө шударгаар ажиллах хүмүүсийг хассантай нэгэн адилаар орон нутагт ийм байдлаар хандаж байна. Тиймээс гүйцэтгэх товчооны хурлаар энэ асуудлыг ярилцаж шийдвэрээ гаргасан” гэв.
Түүний хэлснээр МАХН-ын гүйцэтгэх товчооны хурлаар тогтоол гаргажээ. Тогтоолд, хэлмэгдүүлэлт, сонгох, сонгогдох эрх чөлөөний асуудал, Засгийн газарт ажиллах эсэх, засгаас гарах эсэхийг бүлгийн нөхөдтэй ярилцах ёстой гэсэн чиглэл өгчээ. Үүний дагуу МАХН-аас Засгийн газарт орсон гишүүд “Шударга ёс” эвслийн бүлгийн гишүүдтэйгээ ярилцаж байгаа аж. Тодорхой хэлбэл, Засгийн газрын хувь заяаны асуудлаар хэлэлцээр хийж байгаа аж. Харин энэ байдлаас төрд тогтворгүй байдал үүсвэл МАХН болон “Шударга ёс” эвслийн бүлэг бус шүүх, хяналтын байгууллагын хараат бус байдлыг алдагдуулж байгаа Монгол Улсын Ерөнхийлөгч Ц.Элбэгдорж хариуцлага хүлээх ёстой гэдгийг Шадар сайд Д.Тэрбишдагва хэлсэн юм.
Засгийн газраас гарах асуудлаа эвсэж Засгийн газар байгуулсан АН-ын дарга Н.Алтанхуяг, ИЗНН-ын дарга С.Оюун нарт хэлж, хэлэлцээр хийнэ гэдгээ хэлэв. Харин маргааш “Шударга ёс” эвслийн бүлгийнхэнтэй хийсэн хэлэлцээрийн талаар дахин мэдээлнэ гэлээ.