Монгол Улс Шанхайн хамтын ажиллагааны орнуудыг төмөр зам, хурдны зам, аж үйлдвэрийн парк зэрэг томоохон төслүүд дээр хамтран ажиллахыг урьж байна гэж Киргизийн нийслэл Бишкект болсон ШХАБ-ын гишүүн орнуудын Засгийн газрын тэргүүнүүдийн уулзалт дээр Монгол Улсын Ерөнхий сайд Н.Алтанхуяг хэлсэн байна.
“Монгол Улс ШХАБ-ын үйл ажиллагаанд идэвхтэй оролцож ирсэн. Энэ байгууллага бол Төв Азид тогтвортой байдал бэхжүүлэх, бүс нутгийн хөгжлийг түргэсгэхэд чухал ач холбогдолтой үүрэг гүйцэтгэж байгаа байгууллага. Бид ШХАБ-тай дэд бүтэц хөгжүүлэх, эрчим хүч, хөдөө аж ахуй, соёл боловсрол, байгалийн гамшигтай тэмцэх салбаруудад идэвхтэй хамтран ажиллахыг хүсч байна. Бид нийтдээ таван тэрбум долларын өртөгтэй 1800 км төмөр зам барих төсөл хэрэгжүүлэхээр төлөвлөж байна. Үүнд бидний аль ч түнш хөрөнгөө оруулаад хамтран ажиллахад нээлттэй” гэж Н.Алтанхуяг хэлжээ.
 Киргизийн нийслэл Бишкект болсон эл зөвлөгөөнд тус байгууллагын гишүүн Орос, Казахстан, Киргиз, Тажик, Хятад улсуудаас гадна ажиглагч Монгол, Иран, Афганистан, Пакистан, Энэтхэгийн төлөөлөгч оролцсон юм.