МАХН-ын дарга Н.Энхбаяртай холбогдох хэргийг маргааш Улсын дээд шүүхээр дэнсэлнэ. Түүний хэрэгтэй холбогдуулан Засгийн газарт байгаа гишүүд нь үнэд орж, аргадуулах аргаа хайж ядаж байна. Ер нь л түүнийг торны цаана суулгачихгүй гэж МАХН-ын гишүүд дэмжигчид дор бүрнээ арга сэдэж байна. Тэдний нэг нь өнөөдөр МАХН-ын дарга Н.Энхбаярын биеийн байдлын талаар Анагаах ухааны доктор, профессор Л.Жамбалжав, ХӨСҮТ-ийн Элэгний клиникийн их эмч М.Тунсаг мэдээлэл өглөө. Тэдний мэдээлснээр Н.Энхбаярын биеийн байдал маш хүнд, амь насанд нь аюул учраад байгаа аж. Түүний өвчнийг Монголд оношлох боломжгүй байгаа гэнэ. Тиймээс өндөр хөгжилтэй оронд шинжилгээ хийлгэх шаардлага байгаа гэдгийг эмч нар хэлсэн юм. Мөн тэдний хэлж байгаагаар уураг буюу альбимуны хэмжээ нь буурч, хоол тэжээлийн дутагдалтай холбоотойгоор зүрх, элэг, бөөрний үйл ажиллагаа мууджээ.
Хэдийгээр Монголын урдаа барьдаг сайн эмч нар эмчилгээ хийж байгаа ч үр дүн гарахгүй байгаа юм байна. Үүний шалтгаан нь сэтгэл санааны тайван бус байдалтай шууд холбоотой гэнэ. Н.Энхбаярын хувьд зоригтой, сэтгэл санаа нь тогтвортой байгаа ч эмчилгээг илүү тайван нөхцөлд, агаар салхинд хийх ёстой гэж тус намын гишүүн Анагаах ухааны доктор Л.Жамбалжав хэлсэн юм.
Сүүлийн үед түүнийг өлсгөлөн зарлана хэмээн шуугих болсон. Энэ асуултын хариуд тус намынхан хэлэхдээ, “Даргын өлсгөлөн зарлах эсэхийг бид мэдэхгүй. Өмнө нь буруугүй гэдгээ нотлох гэж өлсгөлөн зарласан. Одоо ч тэр байр сууриндаа хэвээрээ байгаа” гэв.