Олон улсын авлигын индексийн жагсаалтыг жил бүр гаргадаг Транспэрэнси Интернэшнл байгууллага энэ оныхоо судалгааны дүнг дэлхий нийтэд танилцууллаа. Дэлхий нийтээр хамгийн их яригддаг асуудал болох авлигаас улс орнууд ангид байж чадаж байна уу үгүй юу гэдгийг голтой хэлж чаддаг хэмээн үнэлэгддэг энэхүү судалгаа 2012 онд 200 гаруй орныг хамарснаас манай улс 94 дүгээрт бичигдсэн байна.
Өнгөрсөн оны индексээр Монгол Улс 180 гаруй орноос 120-д орж байсан юм. Гэхдээ үүгээр манайд авлигын түвшин буурч, урагшаа байр ахисан гэж яаран дүгнэж болохгүй нь. Учир нь, Транспэрэнси Интернэшнл байгууллага энэ онд судалгааныхаа арга барил, үнэлгээ өгдөг системээ өөрчилсөн учир өмнөх жилүүдийнхтэй харьцуулахад төвөгтэй юм.
Транспэрэнсигийнхэн улс орнуудын авлигын түвшнийг үнэлэхдээ 0-100 хүртэлх оноогоор дүгнэсэн бөгөөд 100 руу аль болох дөхсөн, өндөр оноотой нь авлига багатай, харин 0 шахсан бага оноотой нь авлигад идэгдсэн гэдгийг илэрхийлэх аж.
Судалгаанаас харвал огт авлигагүй буюу 100 оноо авсан ганц ч орон байхгүй бөгөөд жагсаалтын эхний гуравт бичигдсэн Дани, Финлянд, Шинэ Зеланд гэхэд ижилхэн 90 оноотой байх жишээтэй.  Манай улс авах ёстой 100 онооныхоо ердөө 36-г л авч чадаж байна. Манайхтай адил 94 дүгээр байрыг хуваан эзэлсэн Энэтхэг, Грек зэрэг орнууд гэхэд авлига ихтэйгээр дэлхийд алдартай. Тэгэхээр манай авлигын түвшин дэлхийн хэмжээнд яаж үнэлэгдэж байгаа нь эндээс харахад тодорхой байна.
Судалгаанд хамрагдсан нийт орнуудын гуравны хоёр нь манайх шиг 50-иас доош оноо авсан улсууд байна. Үүнээс харвал авлига гэдэг хаа газрын хамгийн том асуудал бэрхшээл хэвээр байгаа нь харагдаж буй юм. Гэхдээ Сомали, Хойд Солонгос, Афганистан, Судан зэрэг жагсаалтыг сүүлийг мушгисан орнуудад бол байдал бүр хэцүү байгаа нь тэдний авсан 10-аас доош оноогоор илэрхийлэгдэнэ.
Авлига гэдэг нийгмийн шинжтэй том асуудал мэт санагддаг ч эмнэлэгт үзүүлэхийн тулд эмчилгээний мөнгөнөөсөө илүүчилж хэдэн төгрөг атгуулахаас эхлээд амьдралынхаа сайн сайхны төлөө хувийн бизнес эрхлэхэд алхам тутамд учирдаг хүнд суртал, саад бэрхшээл хүртэл хүн бүрт мэдрэгдэж байдаг бидний өдөр тутмын амьдралд бараг нэг хэсэг болтлоо  нэвчсэн “өвчин” юм. Тийм ч учраас нийгмийн энэ бохир өвчнийг анагаахын тулд улс орны Засгийн газар бүр дорвитой арга хэмжээ аваач хэмээн Транспэрэнси Интернэшнл дахин нэг уриалж байна.