Монгол Улсын ерөнхийлөгч асан, МАХН-ын дарга  Н.Энхбаярыг шүүх давж заалдах шатны шүүх хурал өнөөдөр Улсын Дээд шүүхэд болно. Хэрэв шүүх хурлаас түүнд анхан шатны шүүхээс оноосон ялыг хэвээр үлдээвэл өлсгөлөн зарлана гэж Н.Энхбаяр мэдэгдсэн гэсэн яриа бий. Харин МАХН-ын гишүүн Монгол Улсын гавьяат эмч Жамбалжав нарын хэсэг эмч өчигдөр Н.Энхбаяр даргын бие муу байгаа, өлсгөлөн зарлавал даахгүй гэж өчигдөр мэдээлсэн юм.
Өнгөрсөн наймдугаар сарын 2-нд Сүхбаатар дүүргийн шүүхэд болсон. Н.Энхбаяр нарыг шүүсэн хурлаар  Эрүүгийн хуулийн 263.2, 150.3-т зааснаар  Н.Энхбаярыг төрийн албан тушаалаа урвуулан ашиглаж,  аж ахуйн нэгж байгууллагаас онц их хэмжээний хөрөнгө завшсан хэргээр нийт 25 сая төгрөгийн эд хөрөнгө хурааж, дөрвөн жилийн хорих ял, сэтгүүлч До.Чулуунбаатарыг бусадтай бүлэглэн, аж ахуйн нэгжээс онц их хэмжээний хөрөнгө  завшсан хэргээр хоёр жилийн ял оноож, 10 сая төгрөгийн эд хөрөнгө хураахаар шийдвэрлэсэн юм. Мөн  Ж.Мягмаржаргалыг бусадтай бүлэглэн бусдын эд хөрөнгийг завшсан, мөн давтан үйлдлээр мөрийтэй тоглоом тоглосон нь нотлогдсон тул 25 сая төгрөгийн эд хөрөнгийг хурааж, 3.6 жилийн хорих ялаар тус тус шийтгэсэн билээ. Харин Д.Дуламсүрэнг бусадтай бүлэглэн, онц их хэмжээний хөрөнгө завшсан хэргээр ял оногдуулсан ч 2009 оны Өршөөлийн тухай хуульд зааснаар түүнд ногдуулсан үндсэн болон нэмэлт ялыг  бүхэлд нь өршөөлд хамруулсан юм.
Мөн Иргэний хуульд зааснаар Н.Энхбаяраас 54 сая төгрөгийг гаргуулан Гандантэгчинлэн хийдэд олгох, Н.Энхбаяр, Ж.Мягмаржаргал нараас тус бүр 982 сая төгрөг гаргуулж, “Эрдэнэт” үйлдвэрт олгох ялыг хэвээр үлдээсэн. Түүнчлэн ТВ-9 телевизийн хууль бусаар олж авсан гэх техник хэрэгслийг хурааж, улсын орлого болгох шийдвэр гаргасан юм.
Н.Энхбаярыг хэлмэгдүүлж байгаа гэсэн МАХН-ын гүйцэтгэх товчоо, энэ хэлмэгдүүллээ зогсоож, намын даргыг нь суллахгүй бол МАХН-аас Засгийн газарт байгаа гишүүдээ татна гээд байгаа юм.