МАХН-ын Гүйцэтгэх товчооноос улс төрийн зорилгоор дээрээс өгсөн даалгаврын дагуу зарим хараат шүүгчийн гаргасан хууль зөрчсөн шийдвэр болон Сонгуулийн шат шатны байгууллагуудын хууль бус шийдвэрээр МАХН-аас нэр дэвшигчдийг үндэслэлгүйгээр хассаныг эсэргүүцэж, иргэдээ үзэл бодлоор нь ялгаварлан гадуурхаж, элдвээр хяхан хавчиж, хэлмэгдүүлж байгааг таслан зогсоохыг шаардсан байна.
    Хэрэв энэхүү хэлмэгдүүлэлт цаашид тасралтгүй үргэлжлэх аваас МАХН нь хэлмэгдүүлэлтийг хамт хийж байгаа, эсхүл түүнтэй эвлэрсэн юм шиг сэтгэгдэл төрүүлж байгаа тул намын жирийн гишүүд, дэмжигчдийн шаардлагаар МАХН-аас өнөөгийн Засгийн газарт орж ажиллаж байгаа гишүүдийг Засгийн газраас гарах хүртэл арга хэмжээ авах талаар чиглэл гаргаж, түүнийгээ “Шударга ёс” эвслийн удирдах дээд байгууллагаар хэлэлцүүлэхээр шийдвэр гаргасан ажээ.
    Энэ бүхэнтэй холбогдуулж дараахь байр суурийг товчхон илэрхийлэх нь зүйтэй гэж үзжээ. Үүнд:
1.    Засгийн газрыг тогтвортой байлгах нь чухал ач холбогдолтой.
2.    Засгийн газрыг тогтвортой байлгахын үндэс нь хэлмэгдүүлэлтийг таслан зогсоох явдал юм.
Ийм  учир Засгийн газрыг тогтвортой байлгахын тулд захиалгаар ажиллаж байгаа хараат шүүгчдийн балмад ажиллагааг таслан зогсоож, улс орноо хөгжүүлэхийн төлөө хамтран ажиллахыг МАХН-“Шударга ёс” эвсэл бусад намуудад хандан уриалж байна  гэж МАХН-ын дарга, “Шударга Ёс” эвслийн тэргүүн Н.Энхбаяр хэлснийг МАХН-ын даргын ажлын албанаас мэдээлж байна.