МАХН-ын дарга Н.Энхбаяр нарын дөрвөн хүнд холбогдох шүүх хурал өнөөдөр Улсын дээд шүүхэд болж өндөрлөв. Шүүх бүрэлдэхүүн хэргийг хянан хэлэлцсэний эцэст Н.Энхбаярт холбогдох “ТВ-9”, “Эрдэнэт” үйлдвэрийн хэргийг хэрэгсэхгүй болгож, “Өргөө” зочид буудал, “Улаанбаатар таймс сонин”-ы хувьчлалын асуудлыг хэвээр үлдээсэн байна. Тодорхой хэлбэл, “Өргөө зочид буудал”, “Улаанбаатар таймс” сонины хувьчлал нь хууль бус байж, үүнийг Н.Энхбаяр эрх мэдлээ ашиглан хууль бусаар авсан гэж түүнд оноосон 4 жилийн ялыг 2.6 жил болгов. Дээд шүүхээс Н.Энхбаярт холбогдох “Улаанбаатар таймс” сонины хэргийг хэвээр үлдээсэн учир тус сонины эрхлэгчээр ажиллаж байсан До.Чулуунбаатарт оноосон анхан шатны шүүхийг хэвээр баталлаа. Харин “Эрдэнэт” үйлдвэрийн хэргийг хэрэгсэхгүй болгосон болохоор энэ хэрэгт холбогдоод байсан Ж.Мягмаржаргалын ялыг нэг жил болгон өөрчилжээ.
Анхан шатны шүүхээс Н.Энхбаярт дөрөв, Ж.Мягмаржаргал, Д.Дуламсүрэн нарт гурав, До.Чулуунбаатарт 2.1 жилийн хорих ялыг жирийн дэглэмтэй хорих ангид эдлүүлэх шийдвэр гаргаад байсан билээ.