МАХН-ын  Засгийн газраас гарах асуудал хэрхэж байгааг УИХ-ын гишүүн З.Баянсэлэнгээс тодрууллаа.
-МАХН Засгийн газраас гарах асуудал яригдсан. Одоо энэ асуудал хэрхэх бол?
-Манай намын Гүйцэтгэх товчоо хуралдаад Засгийн газраас гарах хэд хэдэн шалтгаан байна гэж үзсэн. Нэгдүгээрт, хэлмэгдүүлэлтийн асуудал. Дараагийнх нь, орон нутгийн сонгуулийн дүн нөлөөлсөн. Ингээд олонхиороо шийдээд Засгийн газраас гарах чиглэл өгсөн. Чиглэлийн дагуу намын дэд дарга Тэрбишдагва Ерөнхий сайд Алтанхуягт албан ёсоор хэлсэн. Одоо эвсэл дотороо энэ асуудлыг ярилцаж байна. Удахгүй эвсэлийн удардах зөвлөл хуралдана.
-Гэхдээ эвслээс гарахгүй гэж ойлгож болох уу. Учир нь, танай намын даргын мэдэгдэлд Засгийн газар тогтвортой байх ёстой, ард түмэнд муу нөлөө үзүүлэхгүй, би ард түмнээ хүндэтгэнэ гэж мэдэгсэн байсан шүү дээ?
-Энэ бол ухаантай хүний мэдэгдэл. Ухаантай хүн намынхаа гишүүдэд хандаж, “Та нар битгий ийм үйлдэл хийгээрэй. Улс орныхоо тогтвортой байдлыг хангаач ээ” гэж хэлсэн. Тэр хүн тэгж хэлсэн ч гэсэн бид өөрсдийнхөө байр суурьт хэвээрээ байгаа.
-МАХН-ын гишүүд Засгаас гарах асуудлыг тэгэхээр намын дарга чинь үүрэг болгоогүй гэж ойлгож болох нь ээ?
-Эвслийн Засгийн газар байгуулагдахад гэрээ хийж байсан. Хууль бус үйлдэл гарах юм бол бид хамтарч чадахгүй гэдгээ эвслийн гэрээнд тусгасан. Үүний дагуу л шийдвэрээ гаргасан.
-Гүйцэтгэх товчооны шийдвэрийг Энхбаяр дарга бус түүний эхнэр Цолмонг үүрэг өгсөн гэсэн мэдээлэл байна?
-Хардах эрх нь та нарт байна. Тэр үүднээсээ Баянсэлэнгэ жаахан өвдөхөд л өлсгөлөн зарлах гэж байна гэж ярьж байна. Бас хамаагүй ингэж ярьж болохгүй ээ. Хэрэв хардмаар байвал хардсан асуултаа сэмхэн асуу л даа. Ийм аймар ноцтой биш байдлаар асуух хэрэггүй. Мэдээж та нарт хардах эрх нь бий. Гэхдээ цагаа тулахаар Цолмон гуай бүхэл бүтэн 21 хүнийг толгойлохгүй. Цолмон бол Энхбаяр даргын л эхнэр шүү дээ.