“Ардчилсан нам “Шударга ёс” эвслийг Засгийн газарт ард түмнийхээ эрх ашгийн үүднээс урьсан. Хамтран ажиллах гэрээ байгуулсан. Гэрээний хугацаа дуусаагүй байгаа” гэж АН-ын бүлгийн дарга Д.Эрдэнэбат мэдээллээ. АН-ын бүлгийн өнөөдрийн хуралдаанаар цаг үеийн асуудлуудыг хэлэлцэж, гишүүдийнхээ байр суурийг сонсчээ. Өнгөрсөн хугацаанд улс төрд өрнөсөн асуудалд АН ямар байдлаар хандах вэ гэдгээ тодорхойлсон байна. УИХ-ын таван гишүүний тангараг өргөх асуудлаас үүдэн МАН чуулганы хуралдааныг гацаасан. Тэгвэл энэ асуудалд АН хуулийн дагуу л хандах ёстой гэдэгт тогтжээ. Нэгэнт СЕХ хуулийн дагуу таван гишүүний тангараг өргөх асуудлыг УИХ-д оруулж ирсэн бол танай, манай нам гэж талцаж, алагчлахгүйгээр хандах ёстой гэдэгт санал нэгдсэн байна. Гэхдээ таван гишүүний тангараг өргөх асуудлыг УИХ-ын чуулганы хэлэлцэх асуудлын дараалалд шууд оруулсан байсныг хэлэлцэх асуудлын бусад гэдэг ангилалд оруулжээ. АН-ын бүлгийн даргын хэлж байгаагаар энэ асуудалд улстөрийн намууд санал нэгдэж байж хэлэлцэх ёстой гэж үзсэн байна. Мөн үүнтэй холбогдуулан Ерөнхийлөгчийн санаачилсан УИХ-ын тухай хууль болон УИХ-ын дэгийн тухай хуулийн төсөлд АН бүлгийнхэн хүндэтгэлтэй хандаж байгаагаа хэлсэн. Гэхдээ өмнө асуудлаа хуулийн дагуу хэлэлцэж байж дараагийнхаа хуулийг өөрчлөх асуудлыг ярина гэдгээ хэлсэн юм.