УИХ-ын чуулганы хуралдааны эхний асуудлаар Өвөрхангай аймгийн 10 дугаар тойргоос сонгогдсон УИХ-ын гишүүн Г.Батхүү, Баянзүрх дүүргээс дахин санал хураалтаар хамгийн олон санал авсан Д.Арвин, УИХ-ын гишүүн У.Хүрэлсүхийн оронд нөхөн сонгогдож байгаа Д.Сарангэрэл нар тангараг өргөлөө. Гурван шинэ гишүүний тангараг өргөх асуудлыг СЕХ-ны дарга Ч.Содномцэрэн УИХ-д танилцуулснаар УИХ-ын гишүүд асуулт асууж хариулт авсан юм. УИХ-ын гишүүн Н.Батцэрэг, “Хэд хоногийн өмнө АН-ын Д.Зоригт тангараг өргөнө гээд танхимд орж ирээд сууж байсан. Гэтэл өнөөдөр Д.Зоригтын нэр байхгүй Г.Батхүү орж ирсэн байна. Яагаад ингэсэн бэ” гэсэн асуултад УИХ-ын дарга З.Энхболд “Энэ талаар СЕХ хариулж чадахгүй” гээд “Д.Зоригт өргөдөл өгч С.Чинзоригийн асуудлыг Өвөрхангайн шүүх хэрхэн шийдэхийг харъя гэсэн” гэлээ.

Харин УИХ-ын гишүүн Г.Уянга “Гуя дагаж хүзүү гэгчээр Г.Батхүү гишүүн яагаад тангараг өргөх гээд ороод ирэв. Тангараг өргүүлэхгүй гээд буйдантай суулт хийгээд байсан МАН-ын гишүүд юу болоод оруулаад ирэв. Үүнд ямар тохироо хийчихэв. Энэ асуултад хэн хариулах ёстой юм бэ. Аль нам нв хариулах ёстой юм бэ” гэсэн асуултад УИХ дахь АН болоод МАН-ынхан хариулт өгсөнгүй. Харин СЕХ-ны дарга Ч.Содномцэрэн, “Өвөрхангай аймгийн сум дундын шүүхийг үндэслэж л ийм шийдвэр гаргасан” гэсэн хариу өглөө. Ийн гишүүд асуулт асууж дууссаны дараа УИХ-ын гишүүний тангарагыг насаар ахмад Д.Арвин уншиж, Г.Батхүү, Д.Сарангэрэл нар дагаж хэлсэн юм. Мөн гишүүний төрийн далбаандаа хүндэтгэл үзүүлж, тангарагын хуудсанд гарын үсэг зурж Төрийн дуудлал эгшиглүүлснээр өнөөдөр УИХ-ын гурван гишүүн тангараг өргөж энэ удаагийн парламент 73 болов. Мөн УИХ дахь эмэгтэй 11 гишүүнтэй боллоо.

Өнөөдөр тангараг өргөсөн Г.Батхүүгийн хувьд хар костьюм өмссөн байсан бол УИХ-ын гишүүн Д.Арван хар хөх өнгийн дээл, Д.Сарангэрэл цэнхэр өнгийн тэрлэг дээлээр гангарчээ.
Харин УИХ-аас гурван гишүүний тангарагийг баталгаажуулж санал хураахад шинэ гишүүн Д.Сарангэрэл өөрсдийнхөө эсрэг санал дарав.