Иргэд сонгуулиар 76 гишүүн сонгодгоос хэн юу хийж байна гэдгийг сонгуулийн дараагаас л мартаж эхэлдэг. Дөрвөн жил болсны дараа гэнэт сонгууль санаанд нь орж, тэр нөхөр тэгж ч юм хийгээгүй, тэр тэгж ч хүний кноп дарсан гээд шивэр авир хийх нь олширдог. Тэгвэл УИХ-ын Тамгын газрын зүгээс УИХ-ын үйл ажиллагааг олон нийтэд ил тод хүргэх үүднээс олон арга хэмжээ авч хэрэгжүүлж эхэлснээ өнөөдөр мэдэгдлээ. УИХ-ын дарга З.Энхболд хэлэхдээ, “Иргэд сонгосон гишүүний сонгогчдын эрх ашгийн төлөө УИХ-ын чуулганы танхимд юу гэж ярьж байна гэдгийг телевизийн мэдээллийн хөтөлбөрөөс л хардаг байсан. Тэгвэл энэ байдлыг арилгаж УИХ-чуулганы үйл ажиллагааг телевизийн гурван сувгаар хүлээн авч үзэх боломжтой боллоо. Энэ бол бидний хийж байгаа ажлын эхлэл” гэлээ. УИХ-аар ямар хууль батлагсан эсэхийг мэдэхийн тулд цаг алдах шаардлагагүй болжээ. Төрийн мэдээлэл эмхэтгэлийг цахим хэлбэрт оруулаад,  IPhone, IPAD-тай хүмүүс үнэ төлбөргүй авч хэрэглэх боломжтой болсон байна. Өмнө нь энэ эмхэтгэлийг мөнгөөр захиалдаг байсан бол ийн үнэгүй болгож байгаа аж. Түүнчлэн “Юнивишн” компанийн кабаелийн сувгаар УИХ чуулганы хуралдаан болон архивыг үзэж болно. Тус компанийн иргэдэд санал болгосон багцад чуулганы хуралдааны архив энэ сарын 5-ны өдрөөс эхлэн оржээ. Харин цаашид өмнөх чуулганы хуралдааны архивыг оруулахын зэрэгцээ Ардын хурлын архивыг ч нэмж оруулах зорилго тавьж байгаа гэдгийг УИХ-ын даргын зөвлөх Д.Одхүү хэллээ. Тэрчлэн гишүүдийн намтар, танилцуулгыг заавал интернетээс бус телевизийнхээ тусламжтайгаар үзэж болохоор болсон тухай мэдээллийг ч тэд өгсөн юм. Ийн УИХ-ын үйл ажиллагаа иргэдэд нээлттэй болж Улсын нууц болон төрийн нууц, хувь хүний нууц, компанийн нууцаас бусдыг нь парламентын холбогдолтой сайд болон телевизийн гурван сувгаар авч болохоор болжээ.